معترض وکیلان: نړۍوال دې په تاکنو کې لاسوهنه نه کوي.
معترضو وکیلانو او نوماندانو په افغانستان کې د امریکا له سفارت، ملګرو ملتونو او اروپايي ټولنې وغوښتل چې په ټاکنو کې لاسوهنه بس کړي.
معترضین وايي، تېرې پارلماني ټاکنې له درغلیو ډکې وې او د کمېشنرانو په عزل کېدو سره د ټاکنو مشروعیت هم له منځه تللی.
د شپاړسمې تقنیني دورې وکیلان ټینګار کوي چې تېرې ټاکنې دې باطلي شي او دوی به نهم کال کار پیل کړي.
د ولسي جرګې د شپاړسمې تقنیني دورې وکیلان او معترضو نوماندانو ګډ اتحاد جوړ کړی او تېرې پارلماني ټاکنې له درغلیو ډکې بولي.
دوی په افغانستان کې د امریکا سفارت، ملګري ملتونه او اروپآيي ټولنه تورنه کړه چې له ټاکنیزې پروسې سره د مرستو تر څنګ خپلې غوښتنې مطرح کوي او لاسوهنې کوي.
اوس چې د کمېسیون مخکني کمېشنران څارنوالۍ ته پېژندل شوي، معترض کاندیدان استدلال کوي چې پر اساس یې پارلماني ټاکنې باطلې دي او پکار ده چې بیا ټاکنې وشي.
تر اوسه د ۱۸ ولایتونو وروستۍ پایلې اعلان شوي او د ۱۵ نورو ولایتونو لا هم پاتې دي. اوس مالومه نه ده چې نوي وکیلان به پارلمان ته ځي او که به پخواني، چې د نهم کال لپاره کار پیل کړي، خو خبرداری دا دی چې مخکیني وکیلان به کار پیل کړي.
معترض نوماندان داسې مهال د پارلماني ټاکنو په تړاو اعتراض کوي، چې دواړو ټاکنیزو کمېسیونونو ته نوي کمېشنران معرفي شوي، او ولسمشر هم لارښوونه ورته کړې چې ژر تر ژره د پارلماني ټاکنو پروسه وروستۍ کړي.
