د طالبانو د امارت مرستیال ملا عبدالغني برادر افغانستان کې د بهرنیو ځواکونو قوماندان جنرال سکاټ مېلر، زلمي خلیلزاد او همداراز له لوړپوړو قطري چارواکو سره لیدلي.
طالبانو په یوې اعلامیې کې ویلي، چې په دغه کتنه کې دوی د افغانستان سولې بهیر، د بهرنیو ځواکونو په وتلو او همداراز وروستیو تحولاتو په تړاو د طالبانو د دريځ په تړاو خبرې کړې دي.
همداراز طالبانو او امریکایانو خپلو خبرو ته د دوه ورځو لپاره وقفه ورکړې.
د طالبانو د قطر دفتر ویاند سهیل شاهین ویلي، د دوی او امریکا ترمنځ د پنځمې ناستې په دویمه ورځ ګټورې خبرې وشوې، خو اوس دواړو خواو د دوه ورځو لپاره دمه اخیستې ده.
ویل کېږي په دغه دوه ورځ کې به دوی له خپلو مشرانو سره سلا مشورې وکړي.
د طالبانو واکمنۍ په مهال د کورنیو چارو وزیر ملا خیرالله خیرخواه ویلي، دواړو خواوو د بهرنیو ځواکونو پر وتلو او د بل چا پر ضد د افغان خاورې پر نه کارېدلو خبرې وکړې.
یوې باوري سرچیني بیا بي بي سي ته ویلي، د تخنیکي څانګو چارې هم تقریباً بشپړې شوې دي او دواړو خواو اړونده دوسیې چمتو کړې دي.
ټاکل شوې طالب او امریکایي استازي به د شنبې ورځ یو ځل بیا خپلمنځي خبرې پیل کړي.
له دې سره د قطر دفتر ویاند سهیل شاهین ویلي، مني چې افغان حکومت د شخړې یوه برخه ده، خو دوی اوس د افغان مسلې په بهرني اړخ کې دي چې له امریکایانو سره د دوی د ځواکونو پر وتلو خبرې کوي.
