ملت سوله غواړي او څوک چې د سولې مخالفت کوي، د ملت مخالفین دي.
اندېښنې دي چې د سولې برخه کې د پرمختګونو سره سره یو لړ خنډونه شته چې ښایي افغانستان یو ځل بیا د ناورین لور ته بوځي.
د خلاصون لار شورا وایي، په عامو خلکو ړندې بمبارۍ د نظام د بقا په ځای د کرکې او نفرت ذهنیت رامنځته کوي.
دغه شورا د حکومت ځينې اقدامات د سولې د سبوتاژ کولو لپاره یاد کړل.
له ګڼې ګوڼې ډکو سیمو کې چاودنې او کلیو کې هوایي بریدونه هغه څه دي چې د ملکي وګړو مرګ ژوبله لوړوي او غبرګونونه یې راپورته کړي.
خلاصون لارې شورا وروستیو هوایي بریدونو کې د ملکي وګړو په مرګ ژوبلې انديښنه وښوده چې د ولس او حکومت ترمنځ به واټن زیات کړي.
د خلاصون لار شورا مشر اکبر اغا د پایدارې سولې غوښتنه کوي چې د پردیو په فرمایش نه وي.
له دې سره اسلامي انقلاب ګوند وایي، ملت سوله غواړي او څوک چې د سولې مخالفت کوي، د ملت مخالفین دي.
له حکومت غوښتنه ده چې له پاکستان سره دې سوله په ګدایي نه غواړي او هڅه دې وکړي چې خپله یې مخامخ خبرو ته حاضر کړي.
دلته د سولې په تړاو د لویې مشورتي جرګې پر راغوښتلو هم نیوکه وشوه چې حکومت تقلبي او فرمایشي مشورتي جرګې باندې کار کوي چې خپل کسان را وبولي.
