ولسمشر غني تمه ښودلې چې سولې ته به افغانان حتمي رسیږي او لنډ وخت کې به د اوربند او سولې زیری واوري.
ولسمشر چې په نیمروز کې د چابهار بندر د سوداګرۍ د پرانیستې مراسمو ته تللی، هلته یې باور ښودلی چې افغانان به د سولې ارمان ته رسیږي.
له دې سره یو ځای ایران او هند هم تمه ښودلې چې مشترکې اقتصادي ګټې به افغانستان د ثبات خواته بوځي.
ولسمشر په دې سفر کې یو ځل بیا په ولسمشریزو ټاکنو ټینګار کړی چې په خپل وخت به ترسره کیږي.
ولسمشر غني چې نیمروز ولایت مرکز زرنج ښار ته د چابهار د بند له لارې د سوداګرۍ پرانیست غونډې ته تللی، هلته یې له خلکو ته تمه ورکړې چې نږدې راتلونکي کې به د سولې زیری واوري.
ولسمشر باور لري چې د سولې خبرې یو مهم پړاو ته تللي او تمه شته چې د افغانانو له غوښتنو سره سم به پایله ورکړی.
له ولسمشر سره په دې پرانیست غونډه کې د ایران او هندوستان سفیران هم ملګري و، کابل، تهران او نوی ډيلي چې د چابهار مشترک غړي دي، د دې بندر له لارې سوداګري یې د اقتصاد تر څنګ د ثبات لپاره مهم ګام بللی دی.
د ایران سفیر داسې ویلي (( موږ هیله لرو چې د افغان دولت مخالفې وسله والې ډلې له جګړې لاس واخلي او د سولې له پروسې سره یو ځای شي، د چابهار بندر له لارې سوداګري کولای شي، د اقتصاد تر څنګ ثبات باندې سم اغیز ولري. ))
کابل کې د هند سفیر داسې ویلي (( افغانستان کې اقتصادي وده به د افغانستان تر څنګ د سیمې هېوادونو په وضعیت ښه اغیز ولري، هندوستان نه یواځې د افغانستان اقتصادي رشد کې همکاري کوي، بلکې تر څنګ به یې د سولې او ثبات برخه کې هم همکاریو ته دوام ورکړي.))
ولسمشر غني له خلکو غوښتنه وکړه چې ټاکنې حتمي کیږي او خلک دې د ګډون لپاره چمتووالی ونیسي.
د ټاکنو په تړاو انديښنې وروسته له هغې زیاتې شوي چې ولسمشر په نوي قانون سره کمشنران عزل کړل او نوي کمشنران لا نه دي معرفي شوي.
د کمشنرانو له عزل سره یو ځای د ولسي جرګې د ټاکنو وروستۍ پایلې هم په ځای پاتې دي او نوي کمشنرانو ته په تمه دي چې دا کار خلاص کړي.
