د قطر پراختیايې مالي صندوق د افغانستان پوهنې وزارت سره داسې هوکړه کړې چې پر بنسټ به یې هغو نجونو او هلکانو ته د لیک او لوست زمینه برابریږي چې له ښوونځیو پاتې دي.
یاد صندوق ویلي، د نوې هوکړې پر بنسټ به ۳۰ زره هلکانو او نجونو ته د زده کړو فرصت برابر کړي او دا شمېر له۵۰ سلنه هغو نجونو سره هم مرسته کوي، چې له ښوونځیو پاتې دي.
یاد صندوق زیاته کړې:« زده کړو او پرمختګ لپاره د قطر مالی صندوق د افغانستان پوهنې وزارت سره همکاري کوي، ترڅو د ۳۰ زره هغو نجونو او هلکانو ملاتړ وکړي،چې له ښونځیو بې برخې دي. دا پلان به ۵۰ سلنه هغو نجونو ته د زده کړو زمینه برابره کړي،چې له ښونځیو پاتې دي.»
بلخوا، د امریکا ولسمشر جو بایډن هم تازه ویلي،چې د افغان ښځو ملاتړ کوي.
د افغان ښځو او بشر حقونو برخه کې د امریکا ځانګړې استازې رینا امیري هم له سرپرست حکومت غوښتي،چې د زده کړو برخه کې خپلې ژمنې عملي کړي.
هغې زیاته کړې:« نن یو کال کیږي،چې افغان نجونې په ژړا له ثانوي ښونځیو وشړل شوې او ارمانونه يې مات شول. د طالبانو له ګڼو ژمنو سربیره، د دغو ښونځیو دروازې لا هم تړلې پاتې دي.»
د ښځو حقونو فعالانې بیا د قطر له خوا دا اقدام ستایي او زیاتوي،چې له زده کړو محرومو ځوانانو سره به لویه مرسته وکولی شي.
د سیاسي چارو شنونکي بیا په دې باور دي،چې ځوانانو ته د زده کړو برخه کې خدمات وړاندې کول د حکومتونو مسوولیت او مکلفیت دی او افغان حکومت دې نور د افغان نجونو زده کړې نه ځنډوي.
د قطر د زده کړو په برخه کې مرسته کونکی صندوق به د هېواد په هغو لرو پرتو سیمو کې له نجونو او هلکانو سره مرسته کوي،چې ښوونځیو ته لاسرسی نه لري.
د دې صندوق مالومات ښیي،چې دمګړې په افغانستان کې ۳ اعشاریه ۷ میلیونه ماشومان،چې ۶۰ سلنه یې نجونې دي له زده کړو محروم دي.
