د پکتیا اوسیدونکو روان کال د شپیته ملیونه افغانیو په ارزښت خپله ځمکه ښوونځیو ته وقف کړې ده.
د پوهنې رییس کوچی ځاځی وایي ، چې روان لمریز کال کې د پکتیا اوسیدونکو د ۶۰ ملیونه افغانیو په ارزښت مرکز ګردیز او ولسوالیو کې ۷۲ جریبه ځمکه د ښوونځیو لپاره بیله کړې ده .
پوهنې ریاست وایي ، چې د پکتیا اوسیدونکو د دغه ځمکې د وقف تر څنګ څلیرویشت ملیونه نقدي مرسته هم کړې چې بیلابیلو سیمو کې پرې د ښوونځیو ودانۍ رغول شوي دي.
د پکتیا پوهنې ریاست همدا راز وایي ، چې نږدې اوویا سلنه ښوونځي ودانۍ نه لري او راتلونکی کال به څلویښت ښوونځیو ته ودانۍ جوړې او د تعلیمي کال له پیله وړاندې به لیرې پرتو سیمو ته کتابونه ولیږدوي .
پکتیا کې نږدې ۷۰ سلنه ښوونځي ودانۍ نه لري او پوهنې ریاست وایي ، چې د خلکو په مرسته هڅه کوي چې ګڼو ښوونځیو ته ودانۍ جوړې شي .
پوهنې رییس کوچی ځاځی وایي ، چې د یو شمیر ښوونځیو د ودانیو جوړیدو چارې روانې دي او راتلونکی کال به ۴۰ نورو ښوونځیو ته هم ودانۍ جوړې شي .
پوهنې ریاست وایي، چې روان کال کې یې لس تړلي ښوونځي پرانیستي او زرمت ولسوالۍ کې لا هم د نجونو لس ښوونځي د بیلابیلو لاملونو له مخې تړلي پاتې دي.
روان کال د پکتیا ښوونځیو کې د کتابونو نه موجودیت ستره ستونزه وه خو پوهنې ریاست وایي، چې د تعلیمي کال له پیله وړاندې به ټولو سیمو ته کتابونه ورسوي.
