په کندهار کې د غالۍ اوبدلو صنعت د پراختيا په حال کې دى.
په کندهار دې ولايت کې د کليو د پراختيا رياست مسؤلين وايي هغه کورنۍ چې تازه له پاکستان او ايران څخه راستنيږي دوى ورته د غالۍ اوبدلو په برخه کې د کار زمينه برابره کړې ده .
په ورته وخت کې غالۍ اوبدونکې ښځي وايي، له دې لارې یې د ژوند روزګار ښه شوی او په ډېرې اسانۍ سره کولی شي، کورنی اقتصاد پیاوړی کړي.
دغه صنعت په دې وروستیو کې د هېواد د شمالي ولایتونو تر څنګ سوېل لوېدیځو ولایتونو کې هم پراختیا کړې ده.
دلته په کندهار کې ښځې په خپلو کورونو کې غالۍ اوبدوي او په ښه قيمت يې پلوري چې په دې توګه یوه غالۍ اوبدونکې ښځه هره مياشت له دې لارې تر ٢٠ زرو افغانيو پورې عايد تر لاسه کوي.
د دغو غالیو اوبدونکو ډېره برخه هغه مېرمنې جوړوي، چې په ایران او پاکستان کې تر اوږدې کډوالۍ وروسته هېواد ته له خپلو کورنیو سره یو ځای راستنې شوې دي.
د اړوند مسوولینو په خبره، له تېر يوه کال څخه يې ٣٠٠ کورنيو ته د غالۍ اوبدلو او کار کولو زمينه برابره کړې ده .
په افغانستان کې د ننه يو مترمربع غالۍ په ۱۵۰ ډالره چې شاوخوا ۱۰۲۰۰ افغانۍ کېږي، پلورل کېږي، په داسې حال کې چې دا بيا په اسيايي او اروپايي بازارونو کې متر مربع په ۲۵۰ ډالر پلورل کېږي.
غالۍ اوبدونکې ښځې وايي، په کور دننه او بهر د قالینو د ښه بازار له امله یې روزګار ښه شوی او ورځ تر بلې يې ژوند له اقتصادي پلوه پیاوړی کېږي.
غالۍ په افغانستان کې هم په دوديز ډول په کورونو او هم په مسلکي ډول په کارخانو کې اوبدل کېږي.
خو ډېری افغانان نيوکه لري چې ګواکې د افغانستان غالۍ د پاکستان په نوم بهرنيو هېوادونو ته صادرېږي .
