ولسمشر د شهیدانو کورنیو ته د کوپون د ویش بهیر پرانیسته وکړه.
ولسمشر د افغان امنیتي او دفاعي ځواکونو د شهیدانو کورنیو ته د کوپون د ویش بهیر پیل کړ.
دا بهیر د ولسمشر له لوري ارګ کې پيل شو چې ولایتونو ته به هم وِغځیږي.
ولسمشر په دې تړاو جوړې شوې غونډه کې ویلي چې افغان ځواکونو د دې هېواد ساتونکي دي او دغو ځواکونو ته هر ډول سپکاوی، ملت ته سپکاوی دی چې هیڅ د منلو نه دی.
ولسمشر د طالبانو وروستیو څرګندونو ته په اشارې ویلي چې هیچا ته به اجازه ور نه کړي چې یو ځل بیا د افغانستان تجهیزات کباړ او خرڅ کړي.
ولسمشر هغه ژمنه پوره کړه چې د افغان امنیتي او دفاعي ځواکونو د شهیدانو له وارثینو سره یې کړې وه.
ولسمشر د شهیدانو کورنیو ته د کوپون د ویش بهیر پرانیسته وکړه چې له دې وروسته به اړمن کسان وکولای شي له ټاکل شویو مغازو میاشتنی خوراکي توکي وړیا ترلاسه کړي.
ولسمشر داسې ویلي ((د کوپون وېش له کابله پېلېږي او کرار کرار به په افغانستان شموله ملي پروګرام بدل شي. ټولې مغازې به پر وخت او شفافه توګه د شهیدانو بایمیتریک شویو کورنیو ته په کوپون کې شامل خوراکي توکي ووېشي.))
کوپون کې خوراکي توکي شامل دي چې د افغان ځواکونو د شهیدانو کورنیو ته به د یو کال لپاره ورکول کیږي.
ولسمشر یو ځل بیا په ډاګه وویل چې د افغان ځواکونو هیڅ ډول سپکاوی ورته د منلو نه دی او هغوی چې بیا یې د تجهیزاتو کباړ کیدو ته سترګې نیولي، دا ارمان به یې پوره نه شي.
ولسشمر غني داسې ویلي ((هیچاته به د سولې په پلمه ملي ځواکونو ته د صدمې رسولو اجازه ورنه کړو. هغوی دې دا فکر له ذهنه وباسي چې یو ځل بیا به زموږ ټانکونه، طیارې او نور تجهیزات د زړې اوسپنې په بیه په ګاونډیاو وپلوري.))
د کوپون د وېش دغه پروګرام له بهرنیو مرستو نه، بلکې د جمهوررئیس په مدیریت په تدارکاتو کې له سپمول شویو پیسو تمویلېږي.
