ټاکل شوې چې ځینې افغان سیاستوال به له طالبانو سره مسکو کې غونډه وکړي.
طالبانو هم منلې چې د شیر محمد عباس ستانکزي په مشرۍ به د دوی استازي دغه غونډه کې ګډون وکړي.
ویل کېږي چې مخکینی ولسمشر حامد کرزی، پخوانی طالب چارواکی عبدالسلام ضعیف، د بهرنیو چارو پخوانی مرستیال حکمت خلیل کرزی او د اسلامي وحدت ګوند مشر محمد محقق هغه کسان دي چې غواړي د سولې په تړاو د مسکو ناسته کې ګډون وکړي.
که څه هم په دغه غونډه کې افغان حکومت ته د ګډون بلنه نه ده ورکړل شوې، خو د سولې شورا د دارالانشا رییس محمد عمر داودزي ويلي، د سولې عالي شورا ته د ګډون بلنه ورکړل شوې ده.
د طالبانو د قطر دفتر مشر شیر محمد عباس ستانکزي په دې وروستیو کې ویلي، دوی د افغانستان د وضعیت په اړه له یو شمېر افغان سیاسي څېرو، ګوندونو او نورو ورته ټولنو سره بحث ته چمتو دي.
ټاکل شوې دغه ناسته په مسکو کې راتلونکې سه شنبه او چهار شنبه ترسره شي.
له دې سره روسیې ویلي، د افغان شخړې د سیاسي حل لپاره له اسلام اباد سره همکاري کوي.
دغه راز د روسیې د بهرنیو چارو وزارت ټینګار کړي چې اسلام اباد او مسکو د داعش وسله والې ډلې د پراخېدو په اړه اندېښمن دي.
د زخاروف له دغه څرګندونو څو ورځې مخکې د افغانستان لپاره د روسیې ځانګړی استازی ضمیر کابلوف پاکستان ته لاړ او له پاکستاني چارواکو سره یې د افغان سولې په تړاو خبرې وکړې.
