د امریکا ولسمشر ته د جمهور رئیس غني لیږل شوی لیک افشا شوی دی.
ولسمشر غني د دې لیک په یوه برخه کې د امریکا له ولسمشر ټرمپ غوښتي چې له افغانستان څخه خپل ټول سرتیري ونه باسي.
ولسمشر ماڼۍ په دې اړه خبرې کول نه غواړي، خو امرالله صالح ډاډ ښودلی چې افغان ځواکونه اوس وړتیا لري چې له هېواد او خلکو ساتنه وکړي.
له افغانستان څخه د امریکايي ځواکونو د بشپړه وتو موضوع افغان چارواکي اړ کړي تر څو په دې برخه کې د خلکو او رسنیو له سترګو پناه امریکايي چارواکو ته خپل پیغام ورسوي.
نیو یارک ټایمز د ولسمشر د یوه محرم لیک یوه برخه افشاء کړې چې ولسمشر محمد اشرف غني ټرمپ ته د امریکايي عسکرو د وتلو او د لګښت د کمولو په اړه لیکلی دی.
ولسمشر اشرف غني خپل لیک د سوېلي اسیا لپاره د امریکا بهرنیو چارو وزارت مرستیالې په وسیله لیږلی، دغه لیک د امریکا درې چارواکو نیویارک ټایمز ته تایید کړی، خو تر اوسه جوته نه ده چې ټرمپ به دغه لیک تر لاسه کړی وي که نه، خو ورڅخه غوښتل شوي چې له افغانستانه څخه دې ټول سرتېري نه باسي او بحث ته اړتیا ده چې د بهرنیو ځواکونو لګښت راکم کړو.
د افغان سولې ټینګښت لپاره بیا د طالبانو لویه غوښتنه له افغانستان څخه په تدریجي ډول د بهرنیو ځواکونو وتل اساسي شرط دی.
ولسمشرۍ مانۍ د محمد اشرف غني د افشاء شوي لیک په اړه له نظر ورکولو ډډه وکړه.
خو راتلونکو ټاکنو کې د محمد اشرف غني لومړي مرستیال امرالله صالح له بي بي سره په مرکه کې ډاډ ښودلی چې افغان ځواکونه د بهرنیو ځواکونو پرته هم وړتیا لري چې وضعیت کنټرول کړي.
صالح داسې ویلي (( موږ له افغانستانه تر اوسه یوازې د پیسو په وسیله دفاع نده کړې دلته داسې نور ارزښتونه شته چې موږ ته تواناني راکوي چې له افغانستانه دفاع وکړو، د ولسمشر اند دا و که موږ پخپله له افغانستانه دفاع کوو د بهرنیو مرستو ته اړتیا لرو او زه هم موافق یم چې موږ مرستو ته ډېره اړتیا لرو، ځکه موږ د جګړې په خط کې یو د ترهګرۍ پر وړاندې جګړه کوو، خو داسې چې موږ بې له غربه له خپل عزت دفاع نشو کولای، دا غلته خبره ده.))
محمد اشرف غني څه موده وړاندې ویلي و اوسنی حکومت د امریکا له مرستې او حضور پرته شپږ میاشتې هم دوام نشي کولی.
د امریکا له وروستي دریځ څخه هم داسې ښکاري چې د افغانستان په تړاو یې نظر بدل شوی او په ډاکه یې ویلي چې په افغانستان کې نور خپل ځواکونه نشي پرېښودلی.
