د سیاسي چارو یو شمېر شنونکي وايي، د هېواد په بېلابېلو برخو کې د جګړې شدت او پر لویو ښارونو د طالبانو بریدونه دا په ډاګه کوي،چې د دې ډلې ټول تمرکز پر جګړې دی.
د جګړې پر ښکېلو اړخونو نیوکې دي، چې د خپلو شخصي ګټو لپاره یې د سولې بهیر ټکنۍ کړی او نور ولس له طالبانو د سولې تمه نه لري.
د سیاسي چارو شنونکی نصرت حقپال وايي:« د افغانستان کرکېچ سخت دی،مرګونی حالت دی. ولس او خاوره نوره تباهي خواته روانه ده. افغان حکومت او طالبانو تر منځ د سولې اعتماد صفر شوی او باور نشته چې په خپل سر دې سره جوړ شي.»
طالبان په خپلو خبرو کې د سولې پر خبرو ټینکار کوي،خو خبرې ولاړې دي او برعکس جګړې بې مخینې زور اخیستی دی.
د شنونکو په بارو د جګړې له شدته ښکاري،چې دا ډله د سولې خبرو ته تمایل نه لري او انتخاب یې جګړه ده.
د سیاسي چارو شنونکی ذاکر جلالي وايي:« د سولې بهیر پر ټپه ولاړ دی. د دواړو خواوو بشپړ تمرکز پر جګړې دی،چې له دې لارې لاسته راوړنه ولري. د دې پر ځایوچې د مېز خبرو ته ولاړ شي او زه د سولې بهیر ته هېله من نه یم.»
له افغانانو سربېره د نړیوالو غوښتنه هم د خبرو بیا پیل کول دي او پر دواړو خواوو یې غږ دا دی،چې شخړه دې د مذاکراتو له لارې حل کړي.
اخوا د ولسي جرګې یو شمېر غړي بیا وايي، طالبان دې د جګړې لپاره نورې پلمې نه ګوري او د ولس لپاره دې نور د سولې لاره غوره کړي.
د ولسي جرګې غړی الله ګل مجاهد وايي:« زه د دې جګړې مخالف یم او باید نور افغانان مړه نه شي. دا د حل لار نه ده، د سولې خوا ته دې ولاړ شي.»
روانه جګړه چې، د لسګونه زره کورنیو د بې ځایه کېدو او د زرګونه نورو د ټپي کېدو او وژلو لامل شوې،عام ولسونه ترې نور ستړي دي او له طالبانو غواړي،چې نور دې پر ولس رحم وکړي او جګړه دې بس کړي.
Discussion about this post