د ناټو سرمنشي په افغانستان کې خپل حضور وضعیت پورې مشروط کړی دی.
د سولې له خبرو سره یو ځای بهرني ځواکونه د افغانستان د امنیتي وضعیت په څرنګوالي فکر کوي او د سیمې هېوادونه د خپلو ګټو په خوندي کولو.
تازه د افغانستان لپاره د روسيې استازی پاکستان ته تللی او اسلام اباد کې یې د افغان سولې په تړاو پاکستاني چارواکو سره خبرې کړي.
دا چې د خبرو جزیات څه دي، بهرنیو چارو وزارت څه نه دي ویلي، خو ناټو ویلي، تر هغې افغانستان کې پاتې کیږي چې د ترهګرو د ځپلو پوره ډاډ یې نه وي ترلاسه کړی.
په قطر کې د طالب او امریکايي مرکچیانو له شپږ ورځنیو خبرو وروسته چې ډير کم جزیات یې له رسنیو سره شریک شول، د روسيې یو استازی اسلام اباد ته رسیدلی او هلته یې د بهرنیو چارو وزارت مرستیالې سره پر افغان سوله خبرې کړي.
د پاکستان د بهرنیو چارو وزارت اعلامیه کې داسې راغلي (( د افغانستان لپاره د روسیې استازي ضمیر کابلوف له مرستیالې وزیرې تهمینه جنجوعه سره لیدلي او د دوه اړخیزو اړیکو تر څنګ یې افغان سوله باندې خبرې کړي.))
د ضمیر کابلوف له سفر سره یو ځای کابل کې باور کیږي چې طالبان او پاکستان نږدې همکاري لري او روسیه هڅه کوي پر طالبان د پاکستان له نفوذ ګټه واخلي او د سولې پروسې وروسته هغه انديښنې چې لري، ځوابونه یې پيدا کړي.
له دې سره یو ځای د ناټو سرمنشي په افغانستان کې خپل حضور وضعیت پورې مشروط کړی او ویلي یې دي چې تر هغې به افغانستان کې وي، تر کومه یې چې ډاډ نه وي ترلاسه کړی.
د ناټو سرمنشي داسې ویلي (( د ایتلافي ځواکونو موجودیت حالاتو پورې اړه لري او تر هغې به پاتې کیږي چې ورته اړتیا وي. د سولې مذاکراتو د پایلو له مالومیدو وړاندې بهرني ځواکونه له افغانستان نشي وتلای.))
د ناټو سرمنشي دغه راز ټینګار کړی چې د حالاتو بدلون ته په پام سره به خپل ځواکونه له افغان خاورې وباسي او یا به یې را کم کړي.
