ولسمشرغني له پوره تدبیر سره ژر سوله غواړي.
ولسمشر د سولې روانو هڅو او پرمختګونو په کتو وویل، د سولې لپاره نیت او اراده لري او د سولې بندې دروازې به پرانیزي.
ولسمشر وویل، په افغانستان کې د بهرنیانو اوسنی حضور د هوکړې له مخې دی او هیڅ افغان د اوږدې مودې لپاره د بهرنیانو حضور نه مني.
په قطر کې د طالبانو او امریکایانو تر منځ له څو ورځنیو مبهمو او له ادعاوو ډکو خبرو وروسته افغان ولسمشر هم په دې برخه کې ملت ته وینا وکړه.
ولسمشر په ظاهر کې پرمختګونو ته اشاره ونکړه خو د امریکا له هڅو یې مننه وکړه.
ولسمشر محمد اشرف غني پر سولې د تدبیر ټینګار له دې امله وباله چې د ډاکټر نجیب حکومت له تجربې پوره برداشت لري.
ولسمشر په اوه دقیقه يي پيغام کې د سولې لپاره خپله ژمنتیا بې ریا او سوچه وګڼله او طالبانو ته یې هم وړاندیزونه درلودل.
ښاغلي غني په افغانستان کې د بهرینو حضور د هوکړې له مخې وباله او په تدریجي ډول د بهرنیو ځواکونو وتلو ته لېواله ښکارېده.
ولسمشر غني وویل د روانې جګړې قرباني افغانان ورکوي او طالبان هم باید له افغانانو سره خبرو ته کیني.
د امریکایانو او طالبانو تر منځ تر اوسه څلور ځلې مخامخ او مفصلې خبرې شوي چې د قطر وروستۍ ناسته هم اوږده او له لاسته راوړنو ډکه بلل کیږي خو تر اوسه هلته شوي بحثونه او متقابلې غوښتنه په رسمي ډول رسنیزې شوې نه دي.
په پام کې ده چې د را راونې فبرورۍ میاشتې په وروستیو کې امریکا او طالبان یو ځل بیا د خبرو میز ته سره مخامخ شي.
