Skip to content
د بهرنیو چارو وزارت سرپرست مولوي امیر خان متقي افغانستان کې د سره صلیب نړیوالې کمېټې له مشر ایلوا فیلیون سره په کتنه کې له هغه غوښتي چې اوس د جګړې له پای ته رسېدو سره ټپیان کم شوي او دوی باید په نورو برخو کې خپل فعالیتونه پراخ کړي.
د بهرنیو چارو وزارت له لوري په خپره شوې خبرپاڼه کې ویل شوي، فیلیون د افغانستان په بېلابېلو سکټورونو کې د سره صليب پر فعالیتونو او پروژو خبرې کړې او د خپلو خدماتو د رسولو په برخه کې يې د اسلامي امارت له هر اړخیزې همکارۍ مننه کړې ده.
د فیلیون په خبره، افغانستان تازه له جګړې وتلی هېواد دی او دوی تر بل هر ځای خپل خدمتونه په افغانستان کې متمرکز کړي دي.
د متقي په وینا، د افغانستان امنیت تر بل هر وخت ښه شوی، د جګړو د ختمېدو له امله ټپيان لږ شوي او په کار ده چې د زندانیانو د پالنې، معلولینو ته د مصنوعي اعضاوو د پیوند، د اړتيا په صورت کې بهرنيو هېوادونو ته د معیوبینو انتقال او د داخله ناروغانو د تداوۍ په برخه کې خدمات پراخ شي.
