ځینو باوري سرچینو ویلي، د بهرنیو ځواکونو پر وتلو د هوکړې ترڅنګ ټاکل شوې د طالبانو او امریکا بله ناسته د راتلونکې فبروري میاشتې په ۲۵مه نېټه ترسره شي.
ویل کېږي راتلونکې ناسته کې به په اوربند هم خبرې وشي.
طالبانو امریکا سره منلې چې د هغه بهرنیو جنګیالیو مقابله به کوي چې غواړي له افغانستان څخه امریکا ته ګواښ پېښ کړي.
په قطر کې د امریکایي پلاوي او طالب استازو ترمنځ شپږ ورځنۍ خبرې داسې مهال پای ته رسیږي، چې د رویټرز خبري اژانس د راپور له مخې په دغو خبرو کې امریکا منلې، چې په اتلسو میاشتو کې به خپل سرتیري له افغانستان څخه باسي.
له دې سره زلمي خلیل زاد د موقت او نوي حکومت جوړښت په تړاو خپرې شوې اوازې رد کړې.
د افغان د سولې لپاره د امریکا د بهرنیو چارو وزارت ځانګړي استازي ډاکټر زلمي خلیلزاد پرون ماښام ولسمشر او د حکومت نورو غړو سره د لیدنې په مهال وویل، قطر کې یې له طالبانو سره د موقت او نوي حکومت جوړښت په تړاو خبرې نه دي کړي.
د ارګ له لوري خپره شوې اعلامیه کې د خلیل زاد له قوله لیکل شوي چې زه د موقت حکومت د جوړښت
واک نه لرم.
اعلامیه کې د خلیل زاد دا خبره هم راغلې چې له طالبانو یې د اوربند غوښتنه کړې خو په دې برخه کې پرمختګ نه دی شوی.
