له هغې وروسته چې دنجونو پر مخ د پوهنتونونو دروازې وتړل شوې او په دولتي او غیر دولتي اداراتو او موسیسو کې یې پر کار بندیز ولګول شو، په افغانستان کې د ملګرو ملتونو سیاسي استازوالۍ(یوناما)مرستیال مارکس پوتزل په همدې تړاو د اسلامي امارت له چارواکو سره د خپلو لېدنو لړۍ پیل کړه .
لومړی یې د رئیس الوزرا له مرستیال مولوي عبدالسلام حنفي سره ولیدل او بیا یې د کورنیو چارو سرپرست وزیر سراج الدین حقاني، د رئیس الوزرا له سیاسي مرستیال مولوي عبدالکبیر، د لوړو زده کړو له سرپرست وزیر ملا ندا محمد ندیم او وروستۍ لېدنه یې هم د امر باالمعروف او نهی عن المنکر وزارت له سر پرست سره وه .
په دغو ټولو لېدنو کې د پوتزل ټینګار دا نجونو پرمخ د ښوونځیو او پوهنتونونو دروازو پر بیا پرانېستلو و او په دې تړاو یې د نړۍ اندیښنې، پیغامونه له چارواکو سره شریک کړل.
د پوهنتون استاد فیض محمد ځلاند وايي:« د مارکس پوتزل لېدنې په کابل کې له وزیرانو سره ډېر د ارزښت وړ دي،ځکه نه یوازې دا چې له دې لارې دوه اړخیز تفاهم ته لاره هواريږي،بلکې له نړۍ سره زموږ پیغامونه هم شریک کیږي او نړۍ سره تعامل کې د یوه مثبت لوري ټاکلو ته هم لاره جوړیږي.»
ځینې بیا په دې باور دي،چې دغه لېدنې به هغه مهال ګټورې وي او پایله به ورکړي،چې اسلامي امارت د نړۍ مشروع غوښتنې ومني او اوسني افغان چارواکي مسوولیت لري،چې له نړۍ سره اړیکې ټینګې کړي او هېواد له اوسني وضعیت وژغوري.
د سیاسي چارو کارپوه توریالی ځاځی وايي:« له نړیوالو سره او د ملګرو ملتونو له استازو سره به ناستې هغه وخت ګټورې تمامې شي،چې هغه غوښتنې چې نړیوال یې لري هغه دوی (اسلامي امارت)ترسره کړي.
اسلامي امارت مسوولیت لري،چې له نړۍ او ملګرو ملتونو سره خپلې اړیکې ټینګې کړي،چې وشي کولی دغه ستونزې،چې هیواد او ولس ورسره مخامخ دی،هېواد وژغوري.»
د پوهنتون استاد فیض محمد ځلاند په دې باور دی،چې پوتزل له ټولو اوسنیو حاکمونو سره نږدې اړیکې لري کولی شي چې د رامنځ ته شوې شونزې لپاره حل لار پیدا کړي . کارپوهان وايي دمارک پوتزل له لیدنو وروسته اوس چارواکو په دې کار پیل کړی چې د دشته ستونزو دحل لپاره اسلامي او افغاني حل لارې پیدا کول لپاره بحثونو ته زمینه برابره کړي.
د پوهنتون استاد فیض محمد ځلاند وايي:« پوتزل د المان سفیر په افغانستان کې پاتې شوی دی،له طالبانو سره نږدې اړیکې لري،هغه پوهیږي،چې له طالبانو سره څه ډول خبرې وشي او په دې هم پوهیږي،چې د اوسنۍ کشالې لپاره څه ډول حل لار پیدا شي او طالب لوړي پوړي چارواکي هم لګیا دي،چې د ستونزو پر حل خبرې کوي او د اوسنيو مشکلاتو لپاره یې په یوه افغاني او اسلامي حل لاره باندې بحثونو ته زمینه برابره کړي،چې دا یو مثبت ګام دی.»
له تیرو څو ورځو راهیسې مارکس پوتزل د اسلامي امارت له ټولو مشرانو سره لیدلي او وروستۍ لېدنه یې هم د امرباالمعروف او نهی عن المنکر وزارت له سرپرست وزیر سره وه،چې په ټولو ناستو کې د نجونو د زده کړو پر ځنډیدو او د ښځو کار پر بندیز اندیښنې ښودل شوي دي.
په ورته مهال کابل ته د اسلامي نړۍ دیني عالمانو پلاوي،هم د اسلامي امارت له مشرانو او چارواکو سره لیدلي او د دغو لېدنو منځ پانګه هم د نجونو پرمخ د پوهنتونونو او ښوونځیو دروازو تړلو مسله یاده شوې ده.
