ندیم: د نجونو زده کړو مطلق بندېدو پرېکړه مو نه ده کړې

د لوړو زده کړو  وزارت سرپرست مولوي ندا محمد ندیم په خپل کاري دفتر کې د یوناما له مرستیال مارکس پوتزل او نورو چارواکو سره کتنه کې ویلي، ا. ا او په ځانګړي ډول د لوړو زده کړو وزارت په زده کړیز چوکاټ کې د افغانانو حقونو ته ژمن دی.

ندیم زیاته کړې، په دې هڅه کې دی،چې د اسلامي او ملي ارزښتونو په خوندیتوب سره د هېوادوالو د پرمختګ او ښه والي لپاره کار وکړي. 

سرپرست وزیر د نجونو د زده کړو اړوند د ا.ا وروستیو پرېکړو ته په اشارې سره ویلي، د لوړو زده کړو وزارت د ښځو د زده کړو د مطلق بندېدو پرېکړه نه ده کړې؛ بلکې د ځينو خارجي عواملو له امله ځنډولې دي، موږ په دې هڅه کې یو،چې دغو ستونزو ته د شريعت په رڼا کې حل لاره پېدا کړو.

اخوا بیا په یاده کتنه کې مارکس پوتزل ويلي، د هر هېواد لوړې زده کړې د هغه هېواد په اقتصادي وضعیت مستقیم اغېز لري او دغه راز یې د افغانستان لوړو زده کړو د پرمختګ په برخه کې د همکارۍ ژمنه وکړه  او د ښځينه وو د زده کړو په اړه یې خپله طرحه د لوړو زده کړو له سرپرست سره شریکه کړه.