هغه زیاته کړه:«دغه امن،چې نن د دې هېواد دې سپيرو ځوانانو ټېنګ کړی دی، ایا د نړۍ هغو پرمختللو هېوادونو ټېنګ کړی وه؟ خو نه یې وه ټېنګ کړی. د دې هېواد مزاج دا دی، چې له دې سره به په همکارۍ چلېږئ. له دې هېواد سره به په راشه درشه چلېږئ. که څوک د فشار افشنونه کاروي، نو د دې مانا دا ده،چې افغانستان بېرته ناامنیو ته بیايي او هغه د هېچا پر ګټه نه ده، بیا به یې هېڅ څوک هم کنټرول نه شي کړی.»
متقي په کابل کې وروستۍ امنيتي پېښې د سیمې پر کچه د استخباراتو کار وباله او په خبره يې غواړي د امنیتي وضعیت په تخریب خپلې موخې تر لاسه کړي.
هغه زیاتوي:« نن که زموږ او تاسې سیاست پر مخ ځي او که مو اقتصاد پر مخ ځي او که مو امنیت نور ښه کېږي،دا ټول په هغه صورت کې کېږي، چې موږ له نړۍ سره مثبتې اړیکې ولرو. نن د افغانستان په امنیتي پېښو کې تاسو له استخباراتو پوښتنه وکړئ، چې ایا دا د افغانانو له لاسه دي او که د بهرنیانو له لاسه دي. په دې پېښو کې چې کوم کسان نیول کېږي، دا له کومه ځایه راځي؟ »
د بهرنیو چارو سرپرست وزیر پاکستان سره په ډيورنډ فرضي کرښه وروستیو بریدونو ته په اشاره وویل، شخړې د هېڅ لوري په ګټه نه دي او پاکستان باید په سیاسي او اقتصادي برخو کې متقابل درناوي په پام کې ونیسي.
نومړي زیاته کړه:« زموږ او تاسې ګاونډی هېواد پاکستان، هغوی ته موږ دا خبره کوو،چې زموږ او تاسو سرحدي ځواکونو ترمنځ لانجه نه ستاسو او نه هم زموږ پر ګټه ده. پر کرښه ستونزې جوړول، نه ستاسې او نه هم زموږ پر ګټه دي. زه چې تا ته د ورور، مسلمان او سیال په سترګه ګورم، ته هم په هغه سترګه راته وګوره. تجارت راسره د اصولو په رڼا کې راسره وکړه. راشه درشه راسره د اصولو په رڼا کې راسره وکړه.»
نږدې دوه کاله پوره کیږي،چې هېڅ هېواد د اسلامي امارت سرپرست حکومت پر رسمیت نه دی پېژندلی، بانکي محدویتونه او د افغانستان شتمنۍ لاه کنګل پاتې دي.
د افغانستان په تړاو لویو ناستو کې د اسلامي امارت استازو ته کډون نه ورکول کیږي او یوشمېر طالب مشران،خو له مخکې د سفرونو له بندیز سره مخ دي.
