Skip to content
د چین د بهرنیو چارو وزارت ویاند وانګ وین بین د یوه خبري کنفرانس پرمهال د شهرنو سیمه کې پر کابل هوټل د دوشنبې ورځې برید کې د پنځه چینايي وګړو د ټپي کېدو خبر ورکړ.
په ورته وخت کې وانګ وین بین افغانستان کې چینايي وګړو ته ویلي، چې وضعیت ته په کتو باید ژر تر ژره له افغانستانه ووځي.
هغه زیاته کړې:« په کابل کې پر کابل هوټل د دوشبې ورځې برید کې پنځه چینایي وګړي ټپیان شوي دي. د افغانستان امنیتي وضعیت ته په کتو د بهرنیو چارو وزارت افغانستان کې میشتو ټولو چینایي وګړو او ادارو ته سپارښتنه کوي،چې ژر تر ژره له افغانستانه ووځي.»
بل خوا رویټرز خبري اژانس د کابل هوټل مشر او په افغانستان کې د چینايي پانګوال له قوله لیکلي،چې د برید پرمهال په هوټل کې شااوخوا ۳۰ چینايي وګړي موجود ول، چې له ۱۰ زیات په کې ټپيان شوي دي.
د کابل هوټل مشر یو مینګ هو وايي:«په کابل هوټل کې تر ۳۰ چینایي وګړي میشت ول، چې ۱۴ یې برسیرن ټپیان شوي او پنځه تنه یې د سې شنبې تر ماسپښینه د ایمرجنسي روغتون په بېړني واټ کې ول، پاتې نور له هوټله تښتیدلي وو.»
د چین بهرنیو چارو وزارت ویاند وانګ وین بین د یادې پېښې د پلټنې او عاملینو د سزا غوښتنه کړې.
هغه زیاتوي:« چین له افغان حکومت غواړي،چې د چینایي وګړو خوندیتوب برخه کې له هېڅ ډول هلو ځلو دریغ ونه کړي او د دوشنبې ورځې پېښې په اړه دې هر اړخیزې څیړنې وکړي او د پېښې عاملینو ته دې سخته سزا ورکړي.»
له دې وړاندې کابل کې د پاکستان سفیر ترڅنګ پر روسيي ډیپلوماټانو هم برید ترسره شوی وه، چې اندېښنې یې راپورته کړې وې، خو دا پر چینايانو لومړی برید دی،چې د اسلامي امارت په واکمنۍ کې ترسره کېږي.
د اسلامي دولت نومې ډلې( داعش) د یاد برید مسوولیت منلی او په یوه اعلامیه کې یې د ۳۰ بهرنیو او داخلي کسانو د مرګژوبلې ویلي.
اسلامي امارت بیا ویلي،هېڅ بهرنی وګړی په دې برید کې نه دی ټپي شوی او ټول خوندي ژغورل شوي.
