یو شمېر سیاسي احزاب پر حکومت نیوکه لري چې د ټاکنو پروسه کې یې لاسوهنه کړې.
که تر راتلونکې دوشنبې د کابل رایې بیرته باطلې اعلان نه شي، سیاسي احزاب به د ټاکنیزو کمېسیونونو دروازې وتړي.
کابل کې یو شمېر سیاسي احزاب او مدني ټولنې له ټاکنیزو شکایتونو کمېسیون غواړي چې خپله چوپتیا ماته کړي او کابل کې د بیا ټاکنو زمینه برابره کړي.
دوی پر حکومت هم نیوکه لري چې د ټاکنو پروسه کې یې لاسوهنه کړې.
د ولسي جرګې ټاکنو کې د درغلیو په تړاو یو شمېر سیاسي ګوندونو او مدني ټولنو ګواښ وکړ، که تر راتلونکې دوشنبې د کابل رایې بیرته باطلې اعلان نه شي او بیا ټاکنې ونه شي، نو د دواړو کمېسیونو دروازې به وتړي او مدني خوځښتونو ته به دوام ورکړي.
د افغانستان د متحد ملت او حزب اسلامي ګوندونو استازو له ټاکنیزو شکایتونو کمېسیون هم وغوښتل چې خپله چوپتیا ماته کړي او په زغرده د کابل رایو د باطلېدو پرېکړه دې وکړي.
دوی په ټاکنو پروسه کې د لاسوهنې تور پر حکومت پورې کوي او له حکومت غوښتنه هم کوي چې د دواړو کمېسیونونو مسؤلین عدلي او قضایي ارګانونو ته وروپېژني.
له دې وړاندې هم په وار وار معترضو نوماندان بیلا بیلې غونډې درلودې او د درغلیو په تړاو یې اسناد او شواهد هم رسنیو ته ښودل، خو ډاګیزه پایله یې نه ده ورکړې.
ټاکنیز کمېسیونونه بیا له نوماندانو غواړي چې په دوی باور وکړي.
