Skip to content
له مذهبي ځایونو او سفارت خونو ور اخوا دا ځل د سرپرست حکومت مخالفینو د ملکي کارکوونو ټرانسپورټ او د ژوند او کار ځایونه په نښه کړي.
د پاکستان پر سفارت له بریدو وروسته، لومړی چاودنه د بلخ مرکز مزارشریف ښار کې پر یوه ملي بس شوې، چې ۷ کسان په کې ووژل شول او ۶ نور ټپيان دي.
د دې په تعقیب بله چاودنه د ننګرهار ولایت مرکز د جلال باد ښار د صرافانوپه یو مارکیټ وشوه، چې ګڼو کسانو ته په کې مرګ ژوبله اوښتې.
د کورنیو غبرګونونو تر څنګ دغو پيښو نړیوال غبرګونونه هم پارولي،چې د اسلامي همکاریو سازمان مزارشریف کې چاودنه غندلې او د افغانستان د هر اړخیز پرمختګ لپاره یې سیاسي ټیکاو اړین بللی دی.
د اسلامي همکاریو سازمان:« د دغه سازمان عمومي سکرټریت د افغانستان په شمال مزارشریف کې پر یوه دولتي بس،چې د نفتي توکو د یوه شرکت کارکوونکي په کې سپاره ول، د بم چاودنه په کلکو ټکو غندي. د اسلامي همکاریو سازمان د قربانیانو له کورنیو سره خواخوږي څرګندوي او ټپیانو ته د بېړنۍ روغتیا هېله کوي.د دې تاوتریخوالي ځپلې هېواد لپاره سیاسي ثبات یو اړین شرط دی او پرته له دې ټولنیز او اقتصادي پرمختګ ناشونی دی.»
د افغانستان لپاره د امریکا ځانګړي استازي توماس وېسټ هم دې چاودنو ته غبرګون ښودلی او غندلې یې دي.
دغه راز وېسټ ویلي،چې پر ملکي وګړو بریدونه هېڅ توجیه نه لري او باید مخه یې ونیول شي.
هغه زیاته کړې:« متحده ایالات کابل او مزارشریف کې ترهګريز بریدونه،چې بزدلانه وو او د بې ګناه افغانانو ژوند یې اخېستی، غندي. موږ د پېښو د قربانیانو له کورنیو سره خواخوږې څرګندوو او دغه ډول تاوتریخوالی هېڅ توجېه نه لري.»
په ورته مهال د ایران بهرنیو چارو وزارت پر خپله ټویټر پاڼه وروستۍ چاودنې غندلي او دا ډول پيښې یې ترهګریز بریدونه بللې دي.
د یاد وزارت یوه ویاند ویلي:« په مزار شریف او جلال آباد کې وروستۍ چاودنې چې ګڼ افغانان په کې وژل شوي او ټپیان دي، په کلکو ټکو غندو. د بهرنیو چارو وزارت د دغو ترهګریزو بریدونو قربانیانو ته د تسلیت مراتب او ټپیانو ته د عاجلې روغتیا هېله کوي.»
پر ملکي وګړو بریدونه کومه نوې موضوع نه ده،خو له هغه وخته،چې اسلامي امارت واک ته رسیدلی دی،د هغوی وسله والو مخالفینو د بریدونو یوازینۍ موخه نرم هدفونه دي.
که څه هم بار بار سر پرست حکومت د دا ډول بریدونو د مخنیوي ډاډ ورکړی دی،خو اوس هم وخت ناخته ولسي وګړي پر نښه کیږي.
