د افغانستان لپاره د امریکا ځانګړی استازی توماس ویسټ،چې دا مهال د افغانستان پر مسایلو د خبرو لپاره د سیمې په سفر راوتلی دی، د مخکېني حکومت د ملي روغې جوړې عالي شورا مشر ډاکټر عبدالله عبدالله سره یې د بین الافغاني خبرو پر اړتیا خبرې کړي دي.
توماس ویسټ ویلي، په افغانستان کې د بین الافغاني مذاکراتو په اړه نړیواله اجماع هم شته او افغانان یې باید رهبري وکړي.
ویسټ زیاته کړې:« د افغانانو تر منځ د ملي سیاسي ډیالوګ د بېړنۍ اړتیا په اړه مې له ډاکټر عبدالله عبدالله سره وکتل. نړیواله ټولنه کې د دې اړتیا په اړه اجماع شتون لري،چې افغانان یې باید رهبري وکړي او یو ډول شکل ورکړي.»
د اسلامي امارت او امریکا له هوکړې وروسته، بین الافغاني خبرې چې د قطر په میز روانې وې کومه پایله یې نه درلوده.
دا خبرې،چې د واک پر سر د اسلامي امارت او تیر نظام ترمنځ خورا جنجالي وې، د افغانستان لپاره د امریکا مخکینی استازی زلمی خلیلزاد هم بریالی نه شو،چې دا خبرې تر بریا ورسوي.
اوس چې تیر نظام پرځېدلی او اسلاميامارت واک ته رسیدلی،د افغانستان لپاره د امریکا نوی استازی هم د زلمي خلیلزاد په شان له افغان شخصیتونو سربېره له هغو هېوادونو سره پر خبرو بوخت دی،چې د افغانستان په مسله کې ښکیل دي.
اخوا د سیاسي چارو یو شمېر تحلیل کوونکي بیا د ویسټ ماموریت ته هم د شک پر سترګه ګوري.
د سیاسي چارو تحلیل کوونکی عبدالحکیم روان وايي:« دا چې د خبرو اترو لپاره څوک راځي، په دې کې شک نه شته دی،چې د افغانستان د مسایلو د حل او فصل د لېدونو او خبرو اترو له لارې ممکن دی او پر زور باندې نه کېږي. زور افغانستان وران کړی دی،که طالبان زور کوي او یا هم نور زور کوي، له هغې خیر نه جوړېږي.»
د افغان ملت ګوند مشر ستانه ګل شېرزاد بیا په دې باور دی، که بین الافغاني خبرو پایله ورکړې وای افغانستان به اوس په نړیواله انزوا کې نه وه.
شېرزاد وايي، بین الافغاني مذاکراتو کې د نظام ډول، د واک وېش او د تیر شل کلن بهیر لاسته راوړنې د مذاکراتي ډلو اختلافي مسایل وو.
دغه راز د شېرزاد ټینګار دادی،چې د افغانستان قضیه باید د خبرو اترو په چوکاټ کې حل شي.
هغه زیاته کړه:« دوی باید وهڅول شي، چې خبرو ته کېني نه جنګ ته. زه دا د افغانستان پر ګټه بولم او نړیوال باید د افغانستان مسلې په حل کې له افغانانو سره همکاري وکړي،چې د بین الافغاني ډیالوګ او تفاهم پر اساس دا مسله حل شي، نه د جنګ او جګړې له لارې.»
د بین الافغاني خبرو په اړتیا او پیل یې داسې مهال ټینګار کېږي،چې د اسلامي امارت یو پلاوی دوبۍ او پخوانی ولسمشر المان ته روان شو. اوس به ولېدل شي،چې د اسلامي امارت تر واک لاندې دا مذاکرات په کوم اساس پیل کیږي.
