Skip to content
افغانان له تیرو څو لسیزو راهیسې له بې وزلۍ، بې کارۍ او بد اقتصادي وضعیت کړیږي، خو د اسلامي امارت په واکمن کېدو سره یې بشري او اقتصادي وضعیت لا خراب شوی دی.
د بې وزلۍ د مخنیوي او افغانانو د ژوند د هوساینې په موخه ګڼو هېوادونو د ملګرو ملتونو له لارې خپلو بشري مرستې پیل کړې او لا هم دوام لري.
د افغانستان د بیا رغونې لپاره د امریکا ځانګړې څارونکې ادارې (سیګار) ویلي، له افغانستان سره د مرسته کوونکو هېوادونو له ډلې یوازې امریکا د (یو.ایس.اې.آی.ډي) او بهرنیو چارو وزارت له لارې افغانستان سره له ۱.۱ میلیارد ډالرو زیاتې نغدې مرستې کړې دي.
سیګار زیاته کړې:« په تیرو ۱۵ میاشتو کې امریکا د افغانستان یوازینی ستر ملاتړ کوونکی هېواد پاتې شوی،چې د ۲۰۲۱ کال اګیست میاشتې راهیسې یې ۱.۱ میلیارد ډالر مرسته کړې. د دغو مرستو له ډلې نږدې ۸۱۲ میلیونه ډالر د (یو.ایس.اې.آی.ډي) او ۳۲۰ میلیونه ډالر د بهرنیو چارو وزارت له خوا افغانستان ته لیږل شوي دي.»
سیګار ویلي، د نغدي مرستو تر څنګ امریکا له افغانستان سره اضافي ۳۲۶ اعشاریه ۷ میلیونه بشردوستانه مرستې هم کړي او دا لړۍ به همداسې دوام ولري.
سیګار زیاتوي:« د امریکا له خوا په مرستو کې اضافي ۳۲۶.۷ میلیونه ډالر مرستې هم شاملې دي،چې د سپټمبر په ۲۳ یې اعلان کړې دي. په اضافي مرستو کې د (یو.ایس.اې.آی.ډي ) ۲۰۸ میلیونه بشردوستانه او د بهرنیو چارو وزارت د نفوس، ګډوالۍ او دګډوالو ادارو څخه نږدې ۱۱۸.۸ میلیونه ډالر مرستې شاملې دي.»
دغه راز سیګار ویلي،د ملګرو ملتونو د بشري مرستو د همغږی دفتر(اوچا)اټکل کړی دی،چې لا هم په زرګونو افغانان له بشري ناورین او بې وزلۍ کړیږي.
سیګار زیاته کړې:« د ملګرو ملتونو د بشري مرستو د همغږۍ دفتر(اوچا) اټکل کړی دی،چې له ناورین سره مخ او د زلزله ځپلو په ګډون نور سل زره افغانان اضافي بېړنیو بشري مرستو ته اړتیا لري.»
نه یوازې امریکا بلکې ګڼو نورو هېوادونو هم په تیرو ۱۵میاشتو کې له افغانستان سره په میلیونونه ډالر مرستې کړي او لا هم دا لړی دوام لري، چې هره اوونۍ د افغانستان بانک ته د ۴۰ یا ۸۰ میلیونه ډالرو نغدي کڅوړې رالیږل،یې یوه برخه ده.
له دومره مرستو سره سره د افغانانو اقتصادي وضعیت کې کوم بدلون نه دی راغلی او لاهم میلیونونه افغانان له فقر سره مخ دي.
