Skip to content
په کابل کې د شنبې پر ورځ د « ۱۴۰۱ کال د لېندۍ پر ۵ مه » لسګونه بې سرپرسته ماشومان،چې د یوه خیریه بنسټ له لوري ورته د مسلکي زده کړو زمینه برابره شوې وه، فارغ شول.
دوی ته د موبایل جوړونې څلور میاشتنی پروګرام پیل شوی وه،چې یې زده کړې پایته ورسېدې.
د یاد خیریه بنسټ مشر جاوید ابراهیمي وايي،له دې وروسته دا ماشومان کولی شي، چې له دې لارې پر خپل مټ د کورنۍ اړتیاوې پوره کړي.
ابراهیمي زیاتوي:«زما په ګډون ډېری خیریه بنسټونه دا هڅه کوي،چې پر خلکو خوراکي توکي ووېشي یا هم نغدې پېسې ورکړي. خو وروسته وروسته مې دا فکر وکړ،چې ترڅه وخته ؟ بلاخره یوه لاره خو باید وي، بیا دا انګیزه راته پيدا شوه، که اوس دا یو ورور چې دلته ناست دی، څلور میاشتې راغی، که دوی خپله یو کسب زده کړي او لاړ شي د خپل ځان لپاره خپله پيسې وګټي، زما په اند دا به غوره کار وي.»
نوید او حکمتالله د دغه پروګرام هغه ګډونوال دي،چې هر یو یې د کورنۍ د لسو کسانو سرپرستي کوي، وایي،له دې لارې به یې دوامداره ستونزې حل شي.
د کورس یو تن ګډونوال حکمت الله وايي:«زه نهه کسیزه کورنۍ لرم، مشر د کورنۍ زه یم. یوه مې مور ده، دوه کوچني وروڼه او نورې مې خویندې دي. دا کورس زما لپاره ډېر ګټور تمامېږي،ځکه زه کولی شم،چې نورو وروڼو ته مې هم دا کسب ور زده کړم.»
د کورس یو بل ګډونوال نویدالله بیا وايي:« زموږ لپاره دا کار ډېر ګټور تمامېږي،ځکه اوس په نړۍ کې هر څوک موبایل لري او دا خرابېږي،نو زموږ لپاره دا کار ډېر ګټور دی. موږ د دې کسب په وسیله کولی شو، خپلې کورنۍ ته نفقه پیدا کړو.»
یو شمېر نور ګډونوال یتیم ماشومان بیا وایي،غربت یې د زده کړو مخه ډب کړې او وروسته له دې به له کار کولو سره سره زده کړو ته هم لاس رسی پیدا کړي.
د یاد خیریه بنسټ مشر جاوید ابراهمي وايي، غوښتنه یې دا ده،چې د لومړنیو خوراکي توکو د مرستې پر ځای که دولت او خیره بنسټونه دا ډول کوچني کاروبارونه رامنځته کړي،د شته بې وزلۍ کچه راټیټیدلی شي.
هغه زیاته کړه:« زه وایم، چې خلکو ته باید د کاروبار زمینه برابره شي. ته چې یو څوک د سړک له سر اخلې، ښه! فکر وکړه،چې ټول مستحق نه ول، په دې کې څوتنه واقعا مستحق ول، پایله څه ده؟ ته خو باید پایله ترې ترلاسه کړې. ته خو باید دوی ته یو کاروبار جوړ کړې، که کاروبار نه وي، ته یې راولې او په زندان کې یې واچوې، یا بل ځای کې یې واچوې، پيسې خو له اسمانه نه رالوېږي.»
ابراهیمي وايي،هڅه کوي،دا لړۍ نږدې راتلونکې کې نورو ولایتونو ته هم وغځوي،ترڅو بې سرپرسته کورنیو ته د کار زمینه برابره کړي.
