Skip to content
د کورنیو چارو وزارت وايي، تازه فارغه شویو ښځینه پولیسو ته دوه میاشتې مسلکي زده کړې ورکړل شوي دي.
د یاد وزارت ویاند عبدالنافع ټکور وایي، دغه ښځینه پولیسې به دعامه نظم ساتنې په برخه کې دندې پيل کړي او په خبره یې هڅه دا ده،چې د ښځینه پولیسو شمیر نور هم لوړ کړي.
ټکور زیاتوي:« د کورنیو چارو وزارت کې د ښځینه پولیسو شتون یوه بېړنۍ اړتیا ده. دا مهال د کورنیو چارو وزارت په بېلابېلو څانګو کې د ښځینه پولیسو تجربه لرونکې کارکوونکې شتون لري، خو دا شمېره بسنه نه کوي. موږ هڅه کوو،چې نورې پخوانۍ ښځینه پولیسې،چې روزل شوي، مسلکي او د پولیسو په بېلابېلو څانګو کې ښه کاري تجربه ولري، په دندو وګوماروو.»
تازه فارغ شوې ښځینه پولیسې خوشاله دي،چې دخپلو امنیتي ځواکونو لیکو سره یوځای شوي او هیواد ته خدمت کوي.
دوی دغه راز له ټولو هغو ښځینه پولیسو،چې واک ته داسلامي امارت له رسېدو سره جلاوطنه شوې،هېواد ته د بېرته راستنیدو غوښتنه وکړه.
نوې فارغه شوې پولیسه خدیجه وايي:« زموږ لپاره ډېر ګټور وو. ډېر څه مو زده کړل او کولی شو د دندې پر مهال له ځانه دفاع وکړو.»
نوې فارغه شوې پولیسه زهرا وايي:« زما غوښتنه دا ده،کومو ښځو چې پخوا د پولیسو په لیکو کې دنده ترسره کوله او اوس نشته بېرته دې راشي، ځکه هېڅ ډول ګواښ او فشار نشته دی. را دې شي او خپلو خلکو او هېواد ته دې خدمت وکړي او هغوی چې بهر ته وتلي هم را دې شي او خپلو هېوادوالو ته دې د خدمت جوګه وګرځي.»
د پوځي چارو کارپوهان بیا وايي، غوښتنه یې دا ده،چې ښځو ته دې د نورو نظامي برخو ترڅنګ په ټولو ملکي برخو کې هم دندې ورکړل شي.
د پوځي چارو کارپوه اسدالله ندیم وايي:« په امنیتي بنسټونو په تېره بیا د پولیسو لیکو کې د ښځو شتون ډېر اړین دی. طالبان اوس مهال متوجه شوي،چې په دولتي ادارو او په ځانګړې توګه د پولیسو لیکو کې د ښځو له شتون پرته کار شونی نه دی.»
د یادونې ده،چې دا لومړی ځل دی،چې د اسلامي امارت له راتګ وروسته ښځېنه پولیسې په نظامي برخه کې زده کړې کوي او خپلو امنیتي ځواکونو سره لیکو کې شامل کېږي.
