د سیاسي چارو یو شمېر کارپوهان وايي،د افغانستان سیاسي کشالې حل لپاره په اوسنیو شرایطو کې له هغو افغانانو سره چې په تیرو څو لسیزو کې په جګړو کې ښکیل نه وو او ملي فکر لري ناستې او خبرې ګټورې دي.
دوی وايي،د دې لپاره چې د افغانستان اوسنی نظام پر رسمیت وپيژندل شي او افغانان یوځل بیا د نړیوالې ټولنې برخه شي،نو ملي ډیالوګ رامنځ ته کول یې ښه لار ده او باید کار پرې وشي.
د سیاسي چارو کارپوه اجمل سهیل وايي:« اړینه دا ده،چې موږ یو ملي ډیالوګ ته مخه کړو او هغه افراد،چې په کار پوه دي،ملي فکر لري،په تیرو څو لسیزو جګړو کې یې برخه نه درلوده هغو افرادو سره د نظر تبادله او بیا به دې ته زمینه برابره شي،چې دغه نظام په رسمیت وپیژندل شي او افغانستان به د نړیوال کلي یوه برخه وګرځي.»
ځینې نور بیا په دې اند دي،چې ملي ډیالوګ د افغانستان ملي ګټو پر اساس رامنځ ته شي او ابتکار یې هم باید له افغانانو سره وي نو ګټور به تمام شي.
