Skip to content
له نړیوالو سره اوس هم افغانستان کې د ترهګرۍ وېره شته، خو اسلامي امارت نړیوالو ته ډاډ ورکړی دی،چې هېڅکله به له افغانستانه کوم لرې او نږدې هېواد ته ګواښ پېښ نه شي.
روسیه او امریکا هغه زبرځواک هېوادونه دي،چې په دې تړاو یو له بل وړاندې او وروسته د ترهګریزو ګواښونو په اړه اندېښنه څرګندوي.
د سیاسي چارو تحلیل کوونکي، ترهګري یوه وسیله ده،چې امریکا او روسیه دواړه د خپلو ګټو لپاره پرې سیالي کوي.
د سیاسي چارو تحلیل کوونکی یحی چاووش وايي:«دا چې په یو وخت امریکا او روسیه خپله اندېښنه ښیي،دا یوه نړیواله لوبه ده،چې نړیوالو مسایلو پورې تړاو لري.»
اسلامي امارت ویلي،افغانستان کې تروریستي ډلې نه شته او دوی به پرېنږدي،چې د افغانستان خاوره د کوم هېواد پرضد وکارول شي.
امریکا،چې د ترهګرۍ پرضد یې ۲۰ کاله جګړه وکړه،خو د دوی په حضور کې افغانستان سولې او ثبات ته ونه رسېده.
روسیه چې اوس پر نړیواله کچه امریکا سره ښکیله ده،یوازې یې ننداره کړې او د سیمې او افغانستان د ثبات په برخه کې یې مرسته نه ده کړې،خو تل یې د نشه یی توکو او بهرنیو وسله والو په تړاو اندېښنې ښودلې دي.
د سیاسي چارو تحلیل کوونکی حکیم روان وايي:«اصلي خبره داده،چې امریکا په نړۍ کې او هېوادونو کې د خپلو ګټو لپاره هم جګړه اچوي،هم سوله او امنیت راولي،کله یې چې ګټه وي جګړه اچوي. روسان ځکه افغانستان کې اندېښمن دي،چې طالبانو په بدخشان کې د مهدي ارسلان چې ځان تاجکستانی طالب بولي،هغه ته زمینه برابره کړې او څو ولسوالۍ یې لاس کې ورکړي،چې طالبي او تکفیري تبلغات وکړي.»
افغانستان چې په ستراتیژیک او جغرافیوي لحاظ مهم دی،تل ورته د امریکا او روسیې په څېر د زبرځواکو هېوادونو پام اوښتی او دلته یې لاسوهنې کړي،چې په تیرې دوه لسیزې نیابتي جګړه کې یې له افغانانو قرباني واخېسته.
دتحلیل کوونکو پر وینا دا نړیواله لوبه ده،چې روسیې او امریکا په ورته مسایلو دوه قطبي کړې ده.
د سیاسي چارو تحلیل کوونکی اختر محمد راسخ وايي:« دا یوه بهانه ده،چې زبرځواک هېوادونه راشي او مستقیمه لاسوهنه وکړي. نړیوال په ډېرو لوړو کارونو نظر لري،غرب غواړي افغانستان ته د چین او روسې ننوتلو مخه ونیسي،خو دا طالبانو پورې اړه لري،چې څنګه کولی شي افغانستان د نړیوالو له لوبو وساتي.»
افغانستان کې د ترهګرۍ د ګواښ په اړه وېره هغه وخت لا زیاته شوه،چې امریکا ادعا وکړه،چې کابل کې یې د القاعده شبکې مشر ایمن الظواهري وژلی دی.
مسکو بیا شمال کې د مرکزي اسیا پولو کې د القاعده او داعش په تړاو وخت ناوخته اندېښنه څرګندوي او په ګاونډي هېواد تاجکستان کې یې پوځي مانورونه هم ترسره کړل.
داسې انګیرنې دي،چې امریکا افغانستان کې بیا ښکیلتیا او روسیه غواړي، پخوانی شوروي اتحاد بیا راژوندی کړي او په همدې تړاو د مرکزي اسیا هېوادونه ډاروي.
