پوتین: افغانستان کې د سخت درېځو ډلو شتون منځنۍ اسیا ته ورځ تر بلې ګواښ زیاتوي 

د روسې ولسمشر ولاديمر پوتين د ګډو ګټو هېوادونو په استخباراتي ناسته کې د وینا پر مهال په افغانستان کې د القاعدې او داعش ډلې فعالې یادې کړي او انديښنه یې ښودلې،چې يادې ډلې هڅه کوي ،د منځنۍ اسيا هېوادونو ته لار پیدا کړي او د افغانستان پولې ته د نږدې ګاونډيو هېوادونو امنيت وګواښي.

هغه زیاته کړې:«  منځنۍ آسیا هېوادونو ته د داعش، القاعدې او نورو ترهګرو ګواښونه نه دي کم شوي. دا ډلې غواړي،چې منځنۍ آسیا کې نفوذ وکړي. په افغانستان کې فعالې ترهګرې ډلې په ځانګړې ډول هغوی،چې د منځنۍ آسیا هېوادونو پولو ته نږدې فعالې دي،پر دې سیمه یې د برید ګواښ زیات کړی دی.» 

د سیاسي چارو شنونکي په دې باور دي،چې په افغانستان کې د ترهګرۍ شتون او ګواښ په اړه د سيمي هېوادونو ټولې انديښنې په سياسي او استخباراتي موخو ولاړې دي او نه غواړي،چې افغانستان د دايمي ثبات خاوند شي.

د سیاسي چارو شنونکی توريالی ځاځی وايي:« ولې د روسیې ولسمشر ولادیمیر پوتین، امریکا،غربي هېوادونه،ګاوندي او د سیمې هېوادونه، زموږ په اړه اندېښنې ښکاره کوي؟ خو همدغو هېوادونو زموږ هېواد  او ولس د نه زغموونکو،نه بښوونکو، نه هېرېدونکو، ستونزو سره مخامخ نه کړو. دوی د خپلو سیاسي موخو لپاره اندېښنې لري، نه زموږ د ولس او هېواد لپاره.» 

ځینې نور بیا وايي، د نړۍ او سيمي هېوادونه غواړي،چې د ترهګرو د شتون او په ورته نور پلمو د افغانستان د امنیت او ثبات پر سر معامله وکړي.

د سیاسي چارو شنونکی محمد صادق شينواری وايي:« د سیمې او ګاونډیو هېوادونو ځینې استخباراتي کړۍ په دې هڅو کې دي،چې افغانستان بیا ځلې ناامنه کړي.» 

د سیاسي چارو شنونکی قریب الرحمن شهاب بیا د روسیې ولسمشر څرکندونو ته له بلې زاويي ګوري او وايي،پوتين په دا ډول څرګندونو سره غواړي،د امريکا هغه نيمګړتياوې نړۍ ته وښايي،چې په افغانستان کې یې تیرو شلو کلونو په بهیر کې کړې دي.

شهاب زیاتوي:« اصلا خبره دا ده،چې د روسیې ولسمشر ولادیمیر پوتین غواړي،چې نړۍ ته وښايي چې امریکا له افغانستانه تر وتلو وروسته یو ناامنه افغانستان په سیمه کې په میراث پرېښی دی.» 

اخوا د منځنۍ اسیا هېوادونو او اروپايي ټولنې استازو هم  د افغانستان په اړه ځانګړې ناسته کړې،چې د افغانستان پر روان وضعيت يې انديښنه ښودلې ده. 

د  ګډو ګټو هېوادونو ناسته کې  د تاجکستان ازبکستان او ترکمنستان په څېر هغه هېوادونه شامل دي،چې له شوروي اتحاد جلا شوي او درې واړه له افغانستان سره پوله لري.