د افغانستان لپاره د امریکا سفارت شارژدافیرې کرن ډېکر خبر ورکړی دی،چې ترکیې ته تللې او هلته به له میشتو افغانانو سره وګوري .
ډېکر پر خپله ټویټر پاڼه لیکلي،دغه سفر یې پلان شوی سفر دی او په ترکیه کې به له میشتو افغانانو، د بېلابېلو اقشارو او سیاسي فعالانو استازو، میرمنو، ژورنالیستانو، پښتنو، تاجکو، ازبیک او هزاره قومونو سره جلا جلا ناستې ولري .
هغې زیاته کړې:« ترکیې ته سفر له پلان شویو سفرونو دی. دلته په ترکیه کې زه او زما ټیم بېلا بېلو افغانانو سره خبرو ته په تمه یو. موږ به له ښځو، نارینه، ژورنالیستانو، فعالانو، پښتنو، تاجکو، هزاره او ازبیکو سره خبرې وکړو،چې په بهر کې میشت افغانان په افغانستان کې دننه افغانانو سره څه ډول اړیکه لري. د دې خبرو لپاره پلان تیره اوونۍ په متحده عرب امارتو کې ونیول شو.»
د ساسي چارو شنونکي وايي، له افغانانو سره که هغه د باندې دي او که دننه د امریکايي چارواکو لیدنې ګټورې دي،چې په راتلونکي کې د داسې دولت پر جوړښت بریالي شي،چې نجونې په کې د زده کړو له حقه محرومې نه وي او خلک یې هوسا ژوند ولري.
د سیاسي چارو شنونکی کمال ناصر اصولي وايي:«د افغانستان د راتلونکي په اړه که امریکا له ټولو افغانانو سره،چې په بهر او په داخل کې دي، ناستې ولري دا ګټورې دي،ترڅو په افغانستان کې د راتلونکي لپاره داسې یوه دولت لاره هواره کړو،چې په هغه کې د نجونو ښونځي خلاص وي، افغانان په کې د هوساینې ساه واخلي او د هېواد پریښودو ته اړ نه شي.»
هاتف وايي، امریکا دې د ازمایل شویو څیرو پر ځای د افغانستان له اوسني حکومت سره مخامخ او ښکاره خبرې پیل کړي او همدا اوسنی نظام د افغان ولس استازی دی، نه هغه څيرې چې هېواد یې پریښی دی .
هاتف زیاته کړه:« دا هغه خلک دي،چې د افغانستان د لوټلو لپاره یې د افغانستان له هر دښمن سره لاس یو کړی دی.دوی په افغانستان کې رول نه لري، د امریکا استازې باید د افغانستان له ملت سره وګوري،د افغانستان د ملت استازیتوب اسلامي امارت کوي،هېله داده،چې د اسلامي امارت او امریکا ترمنځ خبرې ګړندۍ شي.»
اسلامي امارت بیا له وړاندې له امریکا غوښتي دي،چې له هغه څيرو سره چې د افغانستان په قضایاو کې رول نه لري او د شخصي ګټو پر اساس یې هېواد پریښی دی، باید لیدنې ونه کړي.
