کابلوف: د ترویکا پلس پرځای د یو بل جوړښت لپاره هڅې روانې دي

د ترویکا پلس فارمټ د افغانستان سولې او سیمه ییزو همکاریو لپاره د امریکا، روسیې، چین او پاکستان له لوري رامنځ ته شو او په دې تړاو امریکا،روسیې، قطر او څو هېوادونو کې ناستې وشوې.

د دې فارمټ موخه سیمه کې د افغانستان لپاره د اجماع رامنځ ته کېدل ول.

اوس چې امریکایانو افغانستان کې ماتې خوړلې، د افغانستان لپاره د روسیې ځانګړي استازي ضمیر کابلوف ویلي، دغه جوړښت د امریکا نه همکارۍ له امله ناکام شوی او هڅه کېږي،چې یو بل ورته جوړښت رامنځ ته شي او هغه کې به د  افغانستان لپاره واحده تګلاره وټاکل شي.

کابلوف زیاته کړې:« د ترویکا پلس ناستې چې روسیه، چین، امریکا او پاکستان يې برخوال وو، دا روښانوي،چې امریکا همکاره نه ده او د خپلو هغو ګټو لپاره کار کوي،چې د افغانستان ،روسیې او سیمې په ضرر دي. خو اوس د ترویکا پلس پرځای هڅې روانې دي،چې پر یو بل جوړښت کار وشي او په هغه فارمټ کې به د افغانستان په اړه واحده تګلاره ټاکل کېږي.» 

د ترویکا وروستۍ ناسته  د روسیې پلازمېنه مسکو کې جوړه شوه،چې امریکا په کې د تخنیکي ستونزو له امله ګډون ونه کړ.

مسکو،چین او پاکستان هم بریالی نه شو،چې سیمه کې یوه داسې همغږي رامنځ ته کړي،چې د سیمې او افغانستان ثبات پرې ښه شي. 

کارپوهان وايي، اوس چې امریکا او روسیه د اوکراین پرسر ښې اړیکي نه لري،ښایي د امریکا وتل همدې لپاره وي،چې روسیه د سیمې په ستونزو کې راګیره شي.

دوی وايي، ترویکا ته ورته جوړښتونو رامنځ ته کېدل د افغانستان لپاره پر ګټه دي او ښه ده،چې د افغانستان ستونزې لپاره د سمې هېوادونو همنظري موجوده وي.

د پخوانۍ ولسي جرګې غړی کمال ناصر اوصولي وايي:« د ترویکا پلس  او هغې ته ورته نورې هغه پروسې،چې د افغانستان ستونزو په اړه سیمه کې جوړېږي، د افغانستان او افغانانو لپاره ګټورې دي.» 

ځینې نور بیا وا يي،د ترویکا پلس ناستو بهیر اسلامي امارت سره د امریکا مذاکراتو په درشل کې مهمې ناستې کړي دي او په دې ناستو کې تل ټینګار شوی دی،چې د سیمې ثبات لپاره افغانستان سره همکاري مهمه ده.

دوی وايي، د دغه فارمټ ګډونوال هېوادونه د اسلامي امارت پر وړاندې ګډ دریځ درلود،هغه داچې طالبان باید د اسلامي امارت ترچتر لاندې نظام جوړ نه کړي.

د دوی په خبره، پاکستان چې د افغانستان په قضیه کې مهم اړخ دی،تل یې هڅه کړې،چې سیمه ییز فرصتونه د ځان لپاره استعمال کړي.

اوس به ولیدل شي،چې مسکو راتلونکې څه ډول فارمټ رامنځ ته کوي،خو د اوس لپاره د امریکا د نه ګډون له  امله بیا  د ترویکا کومه ناسته نه ده شوې او نه هم امریکا تر اوسه د دې فارمټه د وتلو اعلان کړی دی.