د امریکا متحده ایالتو بهرنیو چارو وزارت ویاند نیډ پرایس ویلي، له نړۍ ې سره پر ګډه کار کوي،چې د افغانستان نوی حکومت دنړیوالې ټولنې برخه وګرځوي،خو په دې لټه کې نه دي،چې اسلامي امارت پر رسمیت وپیژني.
پرایس ویلي،د افغانستان له نوي حکومت سره به همدې ډول تعامل ته دوام ورکوي او اسلامي امارت له امریکا او نړیوالې ټولنې سره دښو اړیکو د ټینګښت په لټه کې دی.
هغه زیاته کړې:« موږ له نړیوالې ټولنې سره پر ګډه کارکوو،چې دافغانستان نوی حکومت د نړۍ په وینا سمې لارې ته برابر او د نړیوالې ټولنې برخه وګرځي. واشنګټن د اسلامي امارت د رسمیت پیژندنې په لټه کې نه دی او طالبانو سره همدې ډول تعامل ته دوام ورکوو او اسلامي امارت له امریکا او نړیوالې ټولنې سره د ښو اړیکو د ټینګښت په لټه کې دی.»
د سیاسي چارو کارپوهان وايي، امریکا له اقتصادي او نظامي پلوه د نړۍ لومړی درجه زبرځواک هېواد دی او څه چې وغواړي پر بې وزلو او وروسته پاتې هېوادونو باندې یې مني،خو اسلامي امارت ته په کار ده،چې له نړۍ سره تعامل وکړي او له دې پرته یې بهرنيان په ارام نه پریږدي.
د سیاسي چارو شنونکی سرور نیازی وايي:« د امریکا بهرنیو چارو وزارت ځکه داسې خبرې کوي،چې دوی هم زور لري او پیسې لري او هم دوی کولای شي،چې د استخباراتي لوبو له لارې څه یې چې زړه وغواړي پر افغانستان او د افغانستان پر څېر بې وزلو او ورسته پاتې هېوادونو باندې ومني. اسلامي امارت ته هم په کار ده،چې له بهرنیانو سره تعامل وکړي، له دې پرته بهرنیان موږ نه پریږدي .»
د امریکا متحده ایالتو او اسلامي امارت ترمنځ په دوحه کې څو ځلې ناستې شوي،خو تراوسه پورې یې کومه جوته پایله نه ده ورکړې او د هرې ناستې په پای کې پر بیا بیا خبرو ټینګار شوی دی.
کابل هېله لري،چې امریکا دې پر افغانستان لګيدلي ټول بندیزونه لري کړي او له نړۍ غواړي،چې د امریکا متحده ایالتو خوښې ته دې نه ګوري او له افغانستان سره دې ډیپلوماتیکې اړیکې ټینګې کړي.
