د پوهنې وزارت د سرپرست وزیر نور الله منیر وروستیو څرګندونو ته،چې هېواد کې خلک د نجونو له زده کړو سره کلتوري ستونزه لري،لا هم پر کوردننه او بهر له غبرګون سره مخ ده.
تازه په ملګرو ملتونو کې د ناروې سفیرې مونا جول پر اسلامي امارت نیوکه کړې،چې له تېر یو کال یې ښځو او نجونو ته د هغوی بنسټیز حقونه نه دي ورکړي او نجونې یې له زده کړو محرومې کړې دي.
جول زیاته کړه:« د طالبانو له بیا واکمن کېدو یو کال وروسته د ښځو او نجونو وضعیت لا زیات خراب شوی دی. یوه بېلګه یې دا ده،چې اوس مهال افغانستان د نړۍ یوازینۍ هېواد دی،چې نجونې په کې له زده کړو منعه شوې دي.له یوه کال زیات وخت کیږي،چې طالبانو نجونې له ښوونځي راګرځولې دي.»
د پوهنې سرپرست وزیر وروستیو څرګندونو په غبرګون کې د ډېری ولایتونو اوسېدونکو هم د نومړي خبرې د هغه شخصي نظر بولي او وايي،دوی پر خپلو خویندو لوڼو د زده کړو غوښتونکي دي.
