افغانستان کې د اوبو بندونو تاریخي موده پوره شوې او یو شمېر یې د ړنګېدو له خطر سره مخ دي.
د هېواد په کچه شاوخوا شل د اوبو لوی او واړه بندونه شته چې د اوبو او برښنا وزارت یې د خوندیتوب په موخه تخنیکي ستونزې څېړي او رغوي یې.
اوس یوازې د قرغې او درونټې د اوبو بندونه تر بیا رغونې لاندې دي چې نړیوال بانک یې مالي ملاتړ کوي.
افغانستان کې د شل لویو او وړو اوبو بندونو له ډلې یو شمېر یې له جدي ګواښ سره مخ دي.
اوبو او برښنا وزارت، کابل کې د قرغې بند، ننګرهار کې د درونټې، غزني کې د سلطان، د کابل سروبي دویم بند، ماهیپر، نغلو، د هلمند کجکي، پکتیا کې مچلغو، کندهار کې د دهلې او داسې نورو ولایتونو کې د اوبو بندونه سروې کړې او تخنیکي ستونزې یې څېړلي، چې له ډلې یې اوسمهال یوازې د قرغې او درونټې بندونه د بیا رغونې په حال کې دي.
د اوبو او برښنا وزارت د بندونو خوندیتوب په موخه دوه لارښود چپترونه برابر کړي چې له مخې به یې د ټولو بندونو د خوندي ساتلو او سالمې ګټې اخیستنې لپاره ګته پورته کړي.
په ورته وخت کې د کلیو بیارغونې او پراختیا وزارت او طبعي پېښو ته د چمتوالي برخه کې د دولت وزارت د لارښود چپترونو چمتو کېدل لاسته راوړنه ګڼي او تمه لري چې له مخې به یې د اوبو هر څاڅکی خوندي کړي.
په داسې حال کې چې افغانستان کې یو شمېر نوي بندونه د څېړنو، ډیزاین او جوړونې لاندې دي، ټینګار کیږي چې د نږدې سل کلونو زاړه بندونو د خوندیتوب په موخه هم پاملرنه زیاته شي.
