یونېسف زیاته کړې:« دغه پیسې به د څه باندې ۷۰۰ زره ماشومانو سره تغذیوي، له ۳۵۰ زره کسانو سره د پاکو اوبو او پاکوالي په اړه د عامه پوهاوي لوړولو او له څه باندې ۵۰۰ زره نورو افغانانو سره به د رواني ناروغیو او ناچاودو توکو په اړه د عامه پوهاوي برخه کې ولګول شي.»
په افغانستان کې د یونېسف استازي محمد ایویا ویلي، له دې سربیره یونېسف په پلان کې لري،تر څو له دغو پیسو ۱۸ زره هغو کورنیو سره نغدي مرستې وکړي،چې تي ورکونکي میندې په کې اوسي.
دا مرستې داسې مهال کیږي چې یونیسف لا هم افغانستان د ځمکې پر سر د ماشومانو لپاره تر ټولو نامناسب هېواد بولي او زیاتوي،چې ماشومان په کې له ماشومتوبه بې برخې دي.
افغانستان کې د یونېسف استازی محمد ایویا وايي:« افغان ماشومان د محرومیتونو له امله له ماشومتوب بې برخې دي. وچکالي، خوارځواکي، د مخنیوي وړ ناروغۍ، د جګړو اغیزې، متزلزل اقتصاد او د ګڼو ټولنیزو خدماتو نه شتون هغه لاملونه دي،چې افغانستان یې د ماشومانو لپاره تر ټولو نامناسب هېواد ګرځولی دی.»
د یونیسیف له دوه میلیارده ډالرو ور اخوا ملګرو ملتونو په ټوله کې د افغانستان لپاره د پنځه میلیارده ډالرو غوښتنه کړې،چې دا په تاریخ کې د یوه هېواد لپاره تر ټولو ډېرې پیسې دي.
