دغه راز مجاهد وايي،د مقاومت ډلې ټولې هغه ځالې،چې په پنجشیر کې یې د حکومت له سترګو پناه سیمو کې جوړې کړې وې،هم کشف او له منځه تللي دي،چې له دې سره اوس په پنجشیر کې ټول موجوده امنیتي ګواښونه صفر شول.
هغه زیاته کړه:« د پنجشیر په درېیو ولسوالیو کې له خپلو ځالو راکوز شوي و او د اسلامي امارت پر پوستو یې بریدونه کړي ول، د بریدونو په نتجیه کې دیدوی ځای مالوم شوی و او بېرته پرې تعقیبي عملیات پیل شول،چې په نتیجه کې یې درېیو ولسوالیو کې چې دره ده، حصارک دی او افشار دی، د دوی څلور قوماندانان وژل شوي دي او په مجموع کې یې۴۱ تنه یې وژل شوي دي، ۱۱ یو تنه یې ژوندي نیول شوي دي،وسلې او مهمات یې هم نیول شوي دي او هغه ځالې یې هم پیدا شوي دي،چې دوی په کې اوسیدل،هغه هم ویجاړې شوي دي او له منځه تللي دي. اوس عملیات پایته رسیدلي دي او جګړه هم پایته رسیدلې ده او ټول هغه تهدیدونه چې په سیمو کې موجود ول، له منځه تلي دي.»
ذبیح الله مجاهد وايي، د بهرنیو ځواکونو په وتلو سره په افغانستان کې د جګړې لپاره هېڅ ډول پلمه نه ده پاتې او هغه چې د نظام پر وړاندې د مقاومت خبره اوعملي اقدام کوي،نو خطرناکه برخلیک سره به مخ شي.
مجاهد زیاتوي:«جنګ هغه مهال مشروع و،چې دلته بهرني ځواکونه موجود ول، د هغو پر ضد باید جنګ شوی وای او د هغوی پرضد باید مقاومت شوی وای. دا جالبه ده،چې له اشغالګرو سره امریکایانو سره دوستي وشوه،ملاتړ یې وشو، د خپلو خلکو پر ضد ۲۰ کاله هغوی سره ودرېدل او اوس د خپلو افغانانو پر وړاندې د اسلامي نظام پر وړاندې جګړه کوي او د مقامت نوم ورکوي او هغه چې د اسلامي نظام پر وړاندې مقامت کوي،باغی دی اوحکم یې واضع دی.»
د پوځي چارو کارپوه یوسف امین ځاځی وايي:« د قدرت شوقیان او د افغانستان د تجزیې خوبونه،چې څوک ګوري،دا یو سازمان موجود دی، د پنجشیر ولس باید په دې سازمان ځان پوه کړي،د خپلو ګټو لپاره یې پر دوی جګړه تحمیل کړې او خپله له بچیانو سره په بهرنیو هېوادنو کې میشت دي او فرانسه یې ملاتړ کوي.»
له تیر یوه کال راهیسې په افغانستان جګړه پایته رسیدلې او ټول هېواد د واحد مرکزي نظام له لوري اداره کیږي،خو یوازې د پنجشیر ولایت له ځینو لرو پرتو سیمو د جګړې او مقاومت ریپوټونه ورکول کیدل،چې دامنیتي ځواکونو له وروستیو عملیاتو وروسته اوس یې پټن ځایونه له منځه تللي او د تصور وړ امنیتي ګواښونه هم نشته دی.
