Skip to content
د اسلامي امارت مرستیال ویاند بلال کریمي وايي،د پنجشیر په ګډون د هېواد په هېڅ سیمه کې داسې امنیتي تحرکات نشته دي،چې د اندیښنې وړ وي او په لرو او غرنیزو سیمو کې چې کومې کوچنۍ پیښې کیږي،امنیتي ځواکونه پرې تصفویي عملیات کوي.
کریمي وايي،اوس په افغانستان کې د جګړې لپاره هېڅ ډول پلمه نه ده پاتې، اسلامي نظام حاکم دی او پر وینا یې اشغال هم پای ته رسیدلی دی.
کریمي زیاتوي:« د پنجشیر په شمول د هېواد په هیڅ نقطه کې د ملاحظې وړ کومه نښته نه شته او کله چې په لرو پرتو غرنیو سیمو کې دوه درې ټکه وشي، مجاهدین هلته ورځي او سیمه تصفیه کوي،کوم څوک چې وسله په لاس لري، د اسلامي امارت له جدید او قاطعت سره مخ کیږي،ځکه اوس اشغال ختم شوی دی، اسلامي نظام حاکم دی او د جګړې لپاره هېڅ بهانه نه ده پاتې.»
د ریپوټونو له مخې،د مقاومت په نوم ډلې د شابه قرارګاه قوماندان یارمحمد هم له خپلو څو تنو وسله والو سره د اسلامي امارت امنیتي ځواکونو په تصفوي عملیاتو کې وژل شوی دی.
داعملیات د هغو کسانو د لټې په موخه په پنجشیر کې پیل شوي،چې د مقاومت ډلې په نوم دجګړې خبره کوي.
کریمي وايي،هغه څه چې په ټولنیزو رسنیو کې خپریږي،دا مجازي سنګر جوړونه او جګړه ده،چې حقیقت نه لري.
په ورته وخت کې کریمي وايي، افغان امنیتي ځواکونه په ټولو سیمو حاکم دي او چاته د وران کارۍ او نا امنۍ اجازه هم نه ورکوي.
هغه زیاته کړه:« هغه څه چې په فیسبوکونو او سوشل میډیا کې اورېدل کیږي،هغه یوازې میډیايي او مجازي سنګر سازي ده،چې هېڅ ډول حقیقت نه لري او اصلي حقیقت دادی،چې موږ هېڅ ډول د ملاحظې وړ امنیتي ستونزه نه لرو.»
په دې وروستیو کې له پنجشیر ولایت داسې خبرونه خپاره شول،چې ګنې په ځینو سیمو کې د مقاومت په نوم وسله واله ډله امنیتي تحرکات لري او پر د اسلامي امارت پر ځواکونو بریدونه کوي، له دوی سیمې نیسي او مرګ ژوبله ور اړوي خو په ټولنیزو رسنیو کې داسې ویډیو ګانې خپرې شوي،چې د مقاومت په نوم ډلې ته د امنیتي ځواکونو له لوري درانه تلفات اوښتي او ځینې مشران یې هم وژل شوي دي.
