Skip to content
په کابل کې د روسیې سفارت دروازه مخې ته له ځانمرګي برید څلور پنځه وروسته د روسیې استخباراتو امریکا باندې نیوکه کړې،چې دافغانستان ثبات ننګوي.
د روسیې د بهرنیو استخباراتو ادارې (ایس.وي.ار) ویلي، امریکا او ملګرو هېوادونو یې په تېرو۲۰ کلنو کې افغانستان کې له جګړې، ورانیو او سپکاوي پرته بل کار نه دی کړی.
یادې ادارې خپله خبرپاڼه کې امریکا ملامته کړې،چې په اوس او تېر وخت کې د افغانستان دایمي ثبات پر وړاندې مقاومت کوي.
د خبرپاڼې یوه برخه:« امریکا او ملګري هېوادونه یې په افغانستان کې دایمي ثبات نه شي زغملی، په ټوله مانا افغانستان کې د ثبات او امنیت راتګ سره مخالف دي. د دې ترڅنګ امریکا په افغانستان کې تېرو ۲۰ کلونو کې له جګړې، ورانۍ او سپکاوي پرته بل څه نه دي کړي.»
د سیاسي چارو شنونکي بیا په دې اند دي،چې په افغانستان کې د امریکا بې پيلوټه الوتکو تازه تحرکات او پر نړیواله کچه د اسلامي امارت پر چارواکو فشارونه د دې ښکارندوي کوي، چې امریکا افغانستان کې د یوې نوې لوبې په لټه کې ده.
د سیاسي چارو شنونکی عزیز معارج وايي:«خامخا دوی (امریکا) څه اسناد لېدلي. موږ هم ګورو،چې فشارونه جوړوي. د القاعده شبکې مشر ایمن الظواهري د وژنې خبره هم دلته مطرح شوه. همدارنګه داسې د افغانستان حریم ته بې پیلوټه الوتکې راځي. دلته یو څه شته دي،امریکا یو څه په لټه کې ده. هڅه کوي،چې یا جګړه راوړي یا طالبان بوځي د دوحې تړون پرې بشپړ عملي کړي.»
ځینې نور بیا وايي، په سیمه کې پټې او ښکاره جګړې هغه څه دي،چې د نړۍ ستر ځواکونه یې اړ کړي، په ځینو پاتې هېوادونو کې خپل نفوذ پراخ کړي.
دوی وايي، وړاندیز یې دا دی، چې اسلامي امارت باید په داسې موضوعاتو کې هوښیارانه ګام پورته کړي،تر څو بیا د لویو قدرتونو د جګړې ښکار نه شي.
د سیاسي چارو شنونکی شهسوار سنګروال وايي:« دلته یو ډول د امریکا، روسیې او چین ترمنځ سړه جګړه روانه ده. خو د طالبانو اداره باید له سیاسي هوښیارۍ استفاده وکړي.»
شنونکي په دې باور دي،چې د روسیې او اوکراین جګړې د امریکا مخ له افغانستانه اړولی او په دا ډول استخباراتي راپورونو بارو نه شي کېدای.
وړاندې له دې چین هم امریکا تورنه کړې،چې په افغانستان کې يې څه باندې ۵۰ زره ملکی وګړي وژلي.
کابل کې د القاعده شبکې د مشر ایمن الظواهري وژلو ادعاء او د افغانستان په هوايي حریم د امریکايي بې پیلوټه الوتکو ګرځېدل،اسلامي امارت د افغانستان په خاوره ښکاره تېری بللی او وار په وار یې له امریکا غوښتي دي،چې په افغانستان کې دې ثبات او ملي حاکمیت ته ژمن پاتې شي.
