ملګرو ملتونو افغانستان کې د بهرنیو سفارتونو او ډيپلوماټانو پر خوندیتوب ټېنګار کړی 

په کابل کې د روسیې سفارت دروازې مخې، ته د دوشنبې ورځې برید،چې د یو شمېر افغانانو په ګډون په کې دوه روسي ډیپلوماټان هم ووژل شول، د ملګرو ملتونو امنیت شورا یې په افغانستان کې د بهرنیو ډيپلوماټانو امنیت ته اندېښمنه کړې ده. 

د ملګرو ملتونو امنیت شورا دا برید غندلی او پر ښکیلو اړخونو یې غږ کړی دی،چې د بهرنيو سفارتونو او ډیپلوماټانو امنیت باید خوندي وي او د ورته بریدونو د مخنیوي او دریدو غوښتنه یې کړې ده.

امنیت شورا زیاته کړه:« د امنیت شورا پر ټولو اړوندو خواوو غږ کوي،چې د ډیپلوماتیکو ادارو، کونسلګریو او د ملګرو ملتونو  غړو هېوادونو د پرسونل امنیت ټینګ او د خوندیتوب درناوی یې وکړي.» 

په کابل کې اوس مهال  د  شااوخوا ۲۱ هېوادونو سیاسي استازولۍ او د نړیوالو سازمانونو دفترونه فعاله دي. 

د نړیوالې ټولنې ډېر شمېر هېوادونو کابل کې د روسیې سفارت دروازه کې برید ته جدي غبرګون ښوولی دی.

سره له دې چې اسلامي امارت له تېرو دوه ورځو راپدیخوا د برید په تړاو پلټنې پیل کړي،خو کارپوهان وروستیو بریدونو ته په کتو، اسلامي امارت  د امنیت په ټینګښت کې پاتې ګني.

دغه راز دوی وايي، د سفارتونو امنیت ته باید جدي پام وشي،چې دا د نړیوالو او افغان حکومت ترمنځ یو باور دی.

د سیاسي چارو کارپوه نور احمد خالدي وايي:«طالبانو هم په دې اړه له نورو هېوادونو سره په خپلو اقداماتو کې ښه نه دي بریالي شوي،چې هغوی قانع کړي،چې دلته خپل سفارتونه پرانېزي. دلته امنیت شته دی، دلته به خلک د دوی ملاتړ کوي او د طالبانو حکومت پر اوضاع باندې مسلط دی. خو دا د دې ښوونه کوي،چې داسې نه ده. هغه شان چې د امنیت په اړه طالبان وايي، نه ده.» 

د بهرنیو چارو سرپرست وزیر امیرخان متقي،چې د تېر یوه کال لاسته راوړنو په تړاو خبریالانو ته خبرې کولې باور وښود،چې  د یوه کال موده کې یې کوم سفارت او ډیپلوماټ نه دی پر نښه شوی او په خبره د روسیې سفارت د ډیپلوماټانو وژل یو تصادف وه.

هغه زیاته کړه:« دا پېښه هم له سفارته بهر، بلکې د سفارت او پېښې ترمنځ سړک تېر شوی دی، نو ښه په فاصله کې شوی. دا چې تصادف په دې وخت کې هلته د سفارت مامورین هم ورتلي، دا بیا بېله خبره ده. خو په هر حال په راتلوونکې کې به له دې هم زیاته پاملرنه کېږي. د افغانستان امنیتي ځواکونه دې موضوع ته جدي متوجې دي. ټولو سفارتونو او د سفارتونو اړوند هېوادونو ته ډاډ ورکوو،چې د دوی د سفارتونو  او د دوی د ډيپلوماټانو به کلک امنیت نیول کېږي. انشاء الله بیا به داسې پېښې نه تکرار کېږي.» 

کارپوهان وایي،په دې برید سره به د مسکو او کابل ترمنځ اړیکې خرابې نه شي او په دې روسیه هم پوهیږي.

د اوس لپاره روسیې او اسلامي امارت پلټنې پیل کړي او په دې تړاو به راتلونکې کې څرګنده شي،چې د برید ترشاه د کوم هېواد لاس وه.