Skip to content
د افغانستان د احصايې او مالوماتو ملي ادارې ویاند وايي،د جي.ټي.ار په نوم یې له یوې کوریايي کمپنۍ سره د نویو برښنايي پېژندپاڼو د چاپ قرارداد کړی او ۵۰۰ زره جلده یې تر چاپ لاندې دي،چې هېواد ته په رارسیدو سره به یې د وېش بهیر بیا پیل کړي.
هغه زیاته کړه:«د برښنايي پېژندپاڼو نوی قرار داد د جي.ټي.ار له نړیوالې کمپنۍ سره ترسره شوی دی. اسلامي امارت د جي.ټي.ار له کمپنۍ سره درې میلیونه برښنايي پېژندپاڼې قرار داد کړی دی. لومړۍ جوپه به یې د سنبلې پر ۱۳ مه نیټه به یې دلته کابل ته راورسېږي او د برښنايي پېژندپاڼو د وېش لړۍ به بېرته په ټول هېواد کې عادي بڼه خپله کړي.»
په نويو پیژند پاڼو کې د کورينو چارو وزارت پرځای د احصایې او مالوماتو ملي ادارې نوم ليکل شوی دی.
دغه راز د یادې ادارې ویاند وايي، په نويو پیژندپاڼو کې د ولسوالۍ نوم او تمديد نيټه هم اضافه شوې ده.
هغه زیاته کړې:«د برښنايي ډېزاین برخه کې خاص تغییرات نه دي راغلي. اوسنۍ برښنايي پېژندپاڼې هم د جمهوریت پر لوګو باندې چاپ شوي دي. موږ یوازې درې برخو کې تغییرات راوستي دي. یو د برښنايي پېژندپاڼې دا نوی کارت چې دی، دا لس کاله اعتبار لري،چې دا مو په کې اضافه کړی دی. دویم په برښنايي پېژندپاڼه کې د ولسوالۍ نوم هم زیات شوی دی او درېیمه برخه مو د کورنیو چارو وزارت پر ځای مو د احصایې او مالوماتو ملي اداره لیکلې ده. یعنې د برښنايي پېژندپاڼې پر مخ دغه تغییرات راغلي دي.»
د یادې ادارې مسوولینو هېوادوالو ته ډاډ ورکړی،چې د پېژندپاڼو د وېش پروسه جارې ده او هغه کسان،چې بېړنۍ اړتیا ولري،دوی کولی شي جې پېژندپاڼې واخلي.
د مسوولینو په خبره، تر اوسه پورې په ټولو ولایتونو کې ۶۸ مرکزونه فعاله دي،چې خلکو ته د برښنايي پېژندپاڼو په وېش کې فعالیت کوي.
دې ادارې په تیر یوه کال کې د برښنايي پېژندپاڼو له اړخه یو میلیارد۶۰ میلیونه عواید راټوال کړي او په تیر یوه کال کې يې دوه میلیونه وګړو ته برښنايي پېژندپاڼې ویشلې دي.
