د سیاسي چارو کارپوه امیر ګران وايي:« مسله اوس یوه پېچلي پړاو ته داخله شوې، که چېرې دوی په یووالي سره، یوې خولې سره د طالبانو پر مشرۍ باندې بندیزونه دوام پيدا کړي، دا به د خبرو اترو او مذاکراتو په پروسه کې ستونزې رامنځته کړي.»
نړیوال هڅه کوي،چې د فشارونو له لارې اسلامي امارت دې ته وهڅوي،چې د نجونو ښوونځي پرانېستل شي،ښځینه وو ته د حکومت په اډانه کې کار ورکړل شي او دغه راز بشري حقونه خوندي وي.
خو اسلامي امارت له وړاندې خبرداری ورکړی دی،چې ملګري ملتونه دې بندیزونه د فشار په توګه نه کاروي.
د کابل پوهنتون استاد فیض محمد ځلاند وايي:« په تېره یوه میاشت کې طالب چارواکي پر دې بریالي نه شول،چې له افغانستانه بهر چېرې سفر ولري او یا هم بهرنیان دې افغانستان ته راشي. نو د افغانستان اوسنیو مسایلو حل په اړه باندې کوم بحث ورباندې وکړي. ماته ښکاري،چې د دې فاصلو زیاتېدل، دا به سیاسي، اقتصادي او ټولنیزې ناخوالې په افغانستان کې لا زیاتې کړي.»
