مجاهد: له نړیوالو غواړو راسره د اړیکو نوی پړاو پيل کړي 

د افغانستان اسلامي امارت ویاند ذبیح الله مجاهد پر نړیوالې ټولنې او اروپايي هېوادونو غږ وکړ،چې پر امارت فشارونه راکم کړي او د اړیکو نوی پړاو پیل کړي.

مجاهد له یوې هندي رسنۍ سره په تازه مرکه کې دا خبرې کړي او زیاته کړې یې ده،چې اسلامی امارت له امریکا سره هم د اړیکو بېرته رغولو ته لېواله دی.

مجاهد وايي، د اړیکو د نوي پړاو پیل لپاره د دوی له لوري په ډېره جدي توګه کار روان دی.

هغه یو ځل بیا امریکا په دې ملامته کړه،چې د دوحې له هوکړې یې سرغړونه کړې ده.

مجاهد وايي، د افغانستان پر فضايي حریم تیری د هېچا پر ګټه نه دی.