د افغانستان اسلامي امارت د عدلیې وزارت مسولينو د یکشنبې پر ورځ د « ۱۴۰۱ کال د وږي ۱۳ مه» د یوه خبري کنفرانس پر مهال وویل، په هېواد کې د سياسي ګوندونو شتون او فعاليت ته اړتيا نشته دی.
د یاد وزارت مرستیال عبدلکریم حیدر وايي، د سياسي احزابو پخوانيو تجربو ته په کتو يې په تیر يوه کال کې هيڅ کومې سياسي ډلې ته د سياسي کړنو ترسره کولو جواز نه دی ورکړی.
حيدر زیاته کړه:« نن سیاسي حزبونو ته اړتیا نشته. له نېکه مرغه د سیاسي ګوندونو غړي هم په دې نظر دي،چې اوس د اسلامي نظام تر چتر لاندې ژوند کوي او نوره یې اړتیا نه ویني.»
په ورته وخت کې حیدر وايي، په هېواد کې د اوس لپاره ټولې پرپکړې د حنفي فقهې پر بنسټ کوي او دوی د هېڅ ډول قوانینيو له کمښت سره نه دې مخ شوي.
د حیدر په خبره، د نوي اساسي قانون د جوړيدو لپاره تراوسه د اسلامي امارات مشر شیخ هبت الله اخوندزاده له لوري ورته لارښونه نه دی شوی او که لارښوونه ورته وشي،چمتو دي،چې د نوي اساسي قانون جوړلو په طرحه کار وکړي.
