Skip to content
د افغانستان اسلامي امارت د ریاست الوزرا اقتصادي مرستیال ملا عبدالغني برادر وايي، د یوې کمیټې پر مټ یې په هېواد کې د سوالګرو د راټولولو لړۍ پیل کړې او په خبره یې تر دې دمه یې له ۲ زرو زیات سوالګر راټول کړي.
ملا برادر وايي، په دغو سوالګرو کې نږدې ۸۰۰ کسان مستحق دي،خو ۱۵۰۰ نور یې بیا حرفوي سوالګر دي.
اخوند زیاتوي:« په کابل ښار کې د سوالګرو راټولولو کمیټې له لورې تر دې مهال ټولټال ۲۳۴۷ سوالګر راټول شوي،چې له هغې ډلې يې ۷۸۹ مستحق او ۱۵۴۶ يې بیا حرفوي سوالګر پیژندل شوي.»
همدا راز د ریاست الوزرا اقتصادي مرستیال د سرپل ولایت د بندونو سروې او ډیزان چارې هم د اوبو او انرژۍ وزارت ته وسپارلې او د لګښتونو په اړه يې د راپور غوښتنه وکړه.
اخوند زیاته کړه:« د ټاپي پروژې چارې به هم انشاء الله په نږدې راتلوونکې کې پيل شي،چې لومړي استفاده کوونکي او حق داران به یې د هرات ولایت خلک وي. »
د ریاست الوزار اقتصادي مرستیال، ملا عبدالغني برادر همدا راز د یو شمیر مهمو او سترو بندرونو د جوړولو خبر هم ورکړ.
هغه زیاته کړه:« د پاشدان او شینډنډ بندونه مو هم په جدي ډول په نظر کې نیولي دي،چې پرې هغې به هم موږ انشاء ژر ترژره کار شروع کړو.» \
همدا راز د اقتصادي کمیسیون له لوري د اوبو او انرژۍ وزارت او ملي پراختیا شرکت ته سپارښتنه شوې ده،چې په سرپل ولایت کې د سلطان ابراهیم او شورابې بندونو د سروې او ډیزاین لومړنۍ چارې ترسره او د یادو بندونو ټول لګښت دې مالوم او په تړاو یې دغه کمیسیون ته راپور وړاندې کړي.
