کارپوهان: پر ديني علماوو بريد د مذهبې جنګ نوی پیل دی

په ورستيو کې په جوماتونو او ديني عملماوو  بريدونو زياتوالي  له عامو افغانانو سربیره د سياسيونو او د نظر خاوندانو انديښنې هم  ډيرې کړې دي.

د سیاسي چارو یو شمېر کارپوهان په  دې بارو دي،چې پر ديني علماوو او مذهبې ډلو بريدونه د جنګ نوی پیل دی او د جنګ نوې بڼې مهارول به خورا ستونزمن وي.

په ورته وخت کې دوی وايي، په هېواد کې پر ديني مراکزو بريدونونه د بهرنيو استخباراتي ډلو کار  دی.

دوی پر حکومت نیوکه کوي،چې په تیر يوه کال کې نه دی توانيدلی،چې پرعبادت ځایونو او  علماوو  د بریدونو مخنیوی وکړي.

د سیاسي چارو کارپوه ګل اغا حسيني  وايي:«  الحمدالله هغه مستقيم یرغل ختم شو،خو غير مستقيم یرغل سل په سلو کې شته دی.هغه (امریکا) په دې حساب باندې واتوانيدله،چې د يو تعداد لاسپوڅو پر اساس باندې وکولای شي،په جوماتونو کې انتحار او انفجار وکړي او اړوي یې پر داعش او اسلامي  امارات باندې.»

نظامي شنونکي په هيواد کې د مذهبې ډلو ترمنځ شته بې باوري او فکري اختلافات هغه عوامل يادوي،چې ديني علماوو يې د بريدونو هڅې زياتې کړې دي.

يوسف امين ځاځی  وايي:«  يعني تعليم او تربیه خپله پیغمبر د خدای وايي،هغه مور او پلار چې د خپل اولاد تعليم او تربیه کې وروسته  پاتې شوو لوی عذاب دی. اوس موږ په لوی عذاب سره لاس او ګریوان یو او دې نه نړيوال استخبارات استفاده کوي. حکومت ته په کار داده،چې د دې په مورد باندې عامه پوهاوی وکړي، هيڅوک حق نلري څوک تهديد کړي څوک ووژني يا ورته ضرر ورسوي»

دوه ورځې وړاندې په هرات ولایت کې د ګازرګاه جامع جومات پر خطیب مجیب الرحمن انصاري باندې ځانمرګي بريد ترسره شو،چې د انصاري په شمول ۱۸ تنه په کې ووژل شول او ۲۳ نور ټپيان شول.

اسلامي امارت دغه برید غندلی، د برید په تړاو یې څلور تنه داعش غړي نیولي او خبرداری یې ورکړی دی،چې عاملین به یې په خپله  سزا ورسوي.

له دې پیښې يو مياشت وړاندې  د کابل شش درک سيمې په حقانيه مدرسه کې د بريد له امله د يادې مدرسې مشر شیخ رحيم الله حقاني او تر ده وړاندې د کابل کوټه سنګې سيمه کې ديني عالم شيخ سرادار ولي ثاقب په مرموز ډول ووژل شول.