دافغانستان د کورنیو چارو وزارت پخواني وزیر علي احمد جلالي له شمشاد ټلوېزیون سره ځانګړي مرکه کې نیوکه کړې،چې افغانستان ته په تېرو څو لسیزو کې اساسي کار نه دی شوی او له هغو فرصتونو په سمه توګه ګټه نه ده اخېستل شوې،چې افغانانو ته په لاس ورغلي وو.
جلالي وايي،ځینې افغانانو ملي مفکوره نه درولوده او په تېرو څو لسیزو کې اشخاصو او ډلو لپاره کار کېده،همدا لامل و، چې افغانانو ځیني مهم فرصتونه له لاسه ورکړل.
هغه زیاتوي:«خپله افغانان په خپلو منځو کې د یوې ملي مفکورې پر اساس متحد نه ول، بلکې هڅې یې دا وې،چې خپلې ډلې پياوړې کړي، خپل ځان پياوړی کړي. په حکومت کې هم اختلافات موجود ول.»
جلالي افغانان او نړیوال ګرم وبلل،چې افغانستان لپاره یې اساسي کار نه دی کړی او تر ډېره د اقتصاد پياوړتیا او نورو برخو کې لټي شوې.
هغه زیاته کړه:« افغانستان هېڅ کله پر ځان بسیا نه وه، ان په هغه وخت کې چې افغانستان کې سوله وه، شاهي نظام کې، جمهوري نظام کې د داووخان نظام کې تل بهرنۍ مرستې وې،چې د افغانستان بودیجې یوه برخه یې جوړوله.»
فساد هغه بده پدیده،چې له امله یې په تېرو شلو کلونو کې افغانستان د مفسدو هېوادونو د نوملړ په سر کې راغلی،د افغانستان په نړیوال حیثیت او د افغانانو په ژوند یې منفي اغیزې کړي، خو جلالي وايي،دا فساد یوازې افغانانو نه بلکې بهرنیانو هم کړی دی.
جلالي زیاتوي:« څو ډلې وې، هرې ډلې خپل خلک ساتل، که خپل خلک یې فاسد هم ول، خو د دې لپاره،چې بل تنظیم ته ولاړ نه شي، هغه به یې خپله ساتل، تحمل یې درلود او محاسبه یې له چا سره نه کول، له بلې خوا مرستې ډېرې راتلې، په کې محاسبه نه وه،چې پایله کې یې د فساد یو فرهنګ افغانستان کې خپور شو.»
جلالي په دې اند دی،چې امریکا پر کوردننه او بهر فشارونو له امله نور افغانستان کې پوځي حضور نه غوښت او د دوحې پرېکړه یې له افغانستانه د امریکا د خلاصۍ په مانا یاده کړه.
هغه زیاتوي:« د دوحې مذاکرات د امریکا لپاره یوه وسیله وه،چې ځان له افغانستانه خلاص کړي یا داسې لاره پیدا کړي، چې په یوه ښه صورت سره د افغانستان جنګ ختم کړي،ځکه ټولو امریکایانو دا غوښتل،چې امریکا دې له افغانستانه ووځي. »
علي احمد جلالي له امریکا وغوښتل،چې د افغانستان کنګل شوې پیسې ازادې کړي او د افغانستان پر اسلامي امارت یې هم غږ وکړ،چې داخلي مشروعیت ترڅنګ باید له نړیوالو سره داسې اړیکې جوړې کړي،چې ټولو ته د منلو وي.
