ځینې نور بیا وايي، د نړۍ له لوري پر افغان حکومت د بندیزونو لګول او نورې سیاسي ستونزو جوړول د حل لار نه ده او افغان لوری هم باید د خپلو ولسونو لپاره انعطاف وښي،چې نړۍ سره تعامل ته ورسیږي.
دوی وايي،افغان حکومت باید د رسمیت پیژندنې په برخه کې د نړۍ هغه مشروع شرایط،چې له اسلامي او افغاني ارزښتونو سره په ټکر کې نه وي، ومني.
پخوانی سناتور هاشم الکوزی وايي:« بندیزونه او ستونزې جوړول د حل لار نه ده، د دې مشکلاتو پر ځای دې حاکم نظام تعامل وکړي،اسلامي نظام هم باید انعطاف وکړي، ځکه ۴۰ میلیونه جګړه ځپلي او بې چاره ولس درغاړې دي،هر ډول مسوولیت یې ستاسو دی، دوی باید حل لار پیدا کړي، افغانان له مشکلاتو خلاص کړي دا کار تاسو په خپلو امکاناتو نه شئ کولای،تاسو باید د ملګرو ملتونو هغه غوښتنې ومنئ،چې له اسلامي او افغاني ارزښتونو سره په ټکر کې نه دي.»
د سیاسي چارو کارپوهان وايي،په اوسنیو شرایطو کې افغانستان ته اړینه ده،چې د ملي ګټو په رڼا کې نړیوالو سره سیاسي او اقتصادي اړیکې ټینګې کړي او افغان ولس له اوسني بد وضیعت وژغوري.
د سیاسي چارو کارپوه هاتف مختار وايي:« افغانستان اسلامي امارت ته اړینه ده،چې د ملي منافعو په رڼا کې افغانستان له انزوا وباسي او په داسې میکانیزم دې کار وکړي،چې خپل مشروعیت بېرته واخلي او له نړۍ سره ګډه ژبه پیدا کړي،د افغانستان ملي منافع حکم کوي،چې اسلامي امارت دې انعطاف وښي او هېواد دې له داسې یوه وضیعت وژغوري.»
خو اسلامي امارت بیا له وړاندې ویلي، په دغه برخه کې د هېڅ هېواد فرمایش نه مني او ټول هغه شرایط،چې د رسمیت لپاره یوه هېواد ته په کار دي،پوره کړي یې دي.
