Skip to content
ای.بي.سي خبري شبکې د افغان کاریګرو ماشومانو په تړاو یو راپور خپور کړی،چې په یوه برخه کې یې د یونېسف موندنې هم وړاندې کړې دي.
ای.بي.س د ملګرو ملتونو د ماشومانو ملاتړ صندوق (یونیسف) له قوله لیکلي،چې په تخمیني ډول یوازې په کابل کې ۶۰ زره ماشومان د واټونو پر سر کار کوي.
په دغه راپور کې ویل شوي،چې افغانستان کې له سیاسي تحول وروسته زرګونه نور ماشومان په زور له کوره اېستل کیږي،چې پیسې پیدا کړي.
د راپور یوه برخه:« یونېسف په تخمیني ډول دا شمیر وړاندې کړی دی،چې یوازې د کابل ښار په واټونو کې ۶۰ زره کاریګر ماشومان دي. زرګونه نور هم د طالبانو له واک ته رسیدو وروسته په زور له کوره اېستل کیږي،چې پیسې او خواړه پیدا کړي.»
یونېسف ویلي، دغه کاریګر ماشومان ځکه ورځ تر بلې زیاتیږي،چې افغانستان کې اقتصادي وضعیت د خرابیدو لور ته روان دی.
دغې خبري شبکې،همدا راز د یونیسف هغه څرګندونې نقل قول کړي،چې روان او راتلونکی کال به نړیوالې مرستې هم ډېرې راټیټې شي.
د راپور یوه برخه:« یونېسف په دې باور دی،چې راتلونکی کال به نړیواله ټولنه خپله بشري مرسته او د خوړو اړوند مرستې ۳۸ سلنه ته راټيټې کړي او راتلونکو میاشتو ته به بیا دغه مرستې ۸
سلنه ته راټيټې شي. دا ګواښ هم موجود دی،چې روان کال به ۱.۱ میلیونه ماشومان د مرګ له ګواښ سره مخ شي.»
یونېسف ویلي، که مرستې ونه شي او د نړیوالې ټولنې له لوري د وضعیت د رغیدو لپاره مداخله ونه شي دغه ګومان او باور په حقیقت هم بدلیدای شي.
یونېسف داسې مهال دغه له ګواښه ډک تخمینونه وړاندې کوي،چې د ملګروملتونو مخکینو وړاندینو هم ښودلې ده،چې له نیمايي زیات افغانان،چې شااوخوا ۲۳ میلیونو وګړو ته رسیږي، له لوږې سره مخ دي.
