د ملي دفاع وزارت سرپرست وزیر ملا محمد یعقوب مجاهد، چې همدې مراسمو ته یې وینا کوله، افغانستان له نظامي، اقتصادي او سیاسي اړخه بشپړ خپلواک یاد کړ.
هغه زیاته کړه:« ټولو هېوادوالو! ته د خپلواکۍ اخېستلو د ۱۰۳ مې کلیزې په مناسبت مبارکي وایم. الحمد الله هېواد مو په نظامي ډګر کې د هېچ چا تر سیوري لاندې نه دی او نه مو هم ځواکونه چا پورې تړلي دي او نه د چا غلامان دي. الحمد الله نه مو اقتصاد په چا پورې تړلی دی او نه مو هم سیاسي پالیسي چا پورې تړلې ده. په هر ډګر کې ازاد او خپلواک یو.»
مجاهد وايي، د ازادۍ ترلاسه کول او ساتل ستونزې لري، اقتصادي او سیاسي مشکلات د دې لپاره دي،چې ځینې هېوادونه پر موږ داسې غوښتنې ومني،چې ملي ګټې نه ایجابوي.
هغه زیاته کړه:« اقتصادي ستونزې به هم راځي، سیاسي ستونزې به هم راځي، هغه خاص ددې لپاره،چې خلک یا ځینې هېوادونه،چې موږ او تاسو دې ته قانع کړي، ترڅو د دوی هغه غوښتنې،چې هغه زموږ ملي ګټې نه ایجابوي، ورسره ومنو. موږ د خپلې عقیدې او ملي ګټو په خلاف د هېچا اوامر او غوښتنې نه شو منلی.»
مجاهد وايي، تعامل او په هره برخه کې پرمختګ غواړي،چې خو که قیمت یې ازادي او د هېواد ملي ګټي وي،نو نه یې غواړي.
مجاهد زیاتوي:« موږ تعامل غواړو. موږ د هېواد پرمختګ غواړو. موږ د اقتصاد پرمختګ غواړو. موږ سیاسي پرمختګ غواړو. موږ په نظامي ډګر کې د سیمې پر سطحه یو قوي ځواک غواړو، خو دا په دې بیه نه غواړو،چې خپلواکۍ مو تر پوښتنې لاندې راشي.»
د ملي دفاع وزارت سرپرست د شته ستونزو حل ملي یووالی او له نظام څخه ملاتړ یاد کړ.
