افغان سیاستوال او پخواني چارواکي عبدالستار سادات پر خپله ټویټر پاڼه لیکلي، چې افغانانو تل جګړه ګټلې،خو سیاست یې بایللی او له تیرو تجربو او درسونو څخه څه نه دي زده شوي.
سادات زیاتوي:« نن مو د آزادۍ ورځ ده. موږ چې جګړه وګټله او ډ یپلوماسي مو وبایلله (د راولپنډۍ معاهده). آزادي مو حاصله کړه،خو د خپل له جهل آزاد نه شو. اختلافونه مو حل نه کړل، تعلیم مو ونه کړ،ځکه خو تر دې آزادۍ وروسته په یوه پېړۍ کې دوه ځله بیا مستعمره شو. لا مو هم له تېرو درسونو څه زده نه کړل.»
د اوبو د چارو د تنظیم او مدیریت ملي ادارې مشر خانمحمد تکل پر خپله ټویټر پاڼه د زمري ۲۸ مې په اړه لیکلي:« ګرانو هېوادوالو! د خپلواکۍ د تر لاسه کولو ۱۰۳ کلیزه مو مبارک شه!. له نن ۱۰۳ کاله وړاندې د افغان ورونو قومونو پر مټ د دې خاورې یو ننګیالي بچي (شاه امان الله غازي) د انګلیس له استعمار خپلواکۍ تر لاسه کړه او د افغانانو نوم او نښان یې د تاریخ په زرینو کرښو کې ثبت کړ.»
له هېواد بهر یو شمیر اروپايي هېوادونو کې هم ګڼو افغانانو، دافغانستان دخپلواکۍ ۱۰۳مه کلیزه په غونډو او ډول ډول مراسمو او جشنونو نمانځلې ده.
