Skip to content
په کابل کې د چین سفیر وانګ یو د چهار شنبې پر ورځ د «۱۴۰۱ کال د زمري پر ۲۶ مه» د یوه خبري کنفرانس پر مهال د چین او ټایوان موضوع ترڅنګ د افغانستان پر روان وضعیت کورنیو او نړېوالو رسنیو ته مالومات ورکړل.
وانګ یو وايي،امریکا په افغانستان کې له خپل شل کلن حضور سره یوازې د دې هېواد بنسټونه ونړول،چې په پایله کې یې جګړه کلونه اوږده او اداري فساد اوج ته ورسېد.
وانګ یو زیاته کړه:«د امریکا لخوا د افغانستان ۲۰ کلن اشغال له افغانانو سره مرسته ونکړه،ترڅو پرمختګ وکړي،خو یادې جګړې د افغانستان بنسټونه ونړول،چې په نهایت کې د اقتصادي ودې او د خلکو د ژوند د ښه کېدا مخه یې ډب کړه. تېر کال یې خپل سرتیري واېستل او افغانان یې په سختیو کې پرېښودل.»
وانګ یو وايي،امریکا د افغانانو له کلتوري ارزښتونو سترګې پټولې او غوښتل یې د خپلې خوښې ولسواکي پلې کړي،چې یوازې یې ګډوډي وزیږوله.
دغه چینایي ډیپلومات افغانستان کې د امریکا حضور یرغل یاد کړ او زیاته یې کړه،چې حضور یې یوازې ترهګریزې دوه برابره زیاتې کړي دي.
وانګ یو زیاتوي:«امریکا له ترهګرۍ سره د مبارزې برخه کې دوه مخي کړې،چې پایله کې یې افغانستان کې د ترهګرو ډلو شمېر له لسو شلو ته پورته شوی دی. د افغانستان ملي حاکمیت ته په نه کتو د امریکا بې پیلوټه الوتکې لا هم د افغانستان پر فضاء ګرځي. د ترهګرۍ ضد مبارزه باید د یوه هېواد د ملي حاکمیت په بیه نه وي.»
په ورته وخت کې وانګ یو وايي، امریکا د افغانستان بانک د پانګې کنګل کولو سره د افغانانو له جیبونو غلا کوي.
هغه زیاته کړه:«د امریکایي سرتیرو له وتلو وروسته دغه هېواد پر افغانستان اقتصادي او مالي بندیزونه ولګول،پیسې یې ورته کنګل کړې او د بیوزله افغانانو له جیبونو یې پیسې غلا کړې. اوس
افغانان د دې توان نه لري،چې خپلې لومړنۍ بشري اړتیاوې پوره کړي.»
چین که څه هم اسلامي امارت پر رسمیت نه پیژني،خو وانګ یو وايي،هیڅکله یې افغانستان نه دی پریښی او نه یې هم سفارت تړلی دی.
له دې سره هغه وايي،هڅې روانې دي،چې د دوړاو هېوادونو ترمنځ روانې اړیکې لا ژورې شي.
